Intensiv bog‘larda mevali daraxtlarni sovuqdan asrash texnologiyasi

Mazkur video-rolik soha mutaxassislarining tavsiya va maslahatlari bitilgan turkum agro-maslahatlarning bir qismi hisoblanadi.

O‘zR Qishloq xo‘jaligi vazirligining Multimedia markazi tomonidan Qishloq xo‘jaligida bilim, innovatsiya va xizmatlar AKIS markazi, Toshkent davlat agrar universiteti, tajribali fermer va dehqonlar ishtirokida tayyorlandi.

“INTENSIV BOG‘LARDA DARAXTLARNI SOVUQDAN QANDAY ASRASH KERAK?”

Mutaxassislar:

— Qishloq xo‘jaligi fanlari doktori, professor, TDAU “Mevachilik va uzumchilik” kafedrasi mudiri Ilhom Normurodov.

— “Leo Garden” MCHJ agronomi Orifjon Maxmudov.

Daraxtlarni sovuqdan asrash bo‘yicha ishlarni sentabr oyidan boshlash darkor.

Mamlakatimiz qishloq xo‘jaligida intensiv bog‘larda daraxtlarni sovuqdan asrash,  ko‘chatlarni qishga tayyorlash yuzasidan  mavsumiy agrotexnik tadbirlarni o‘z vaqtida o‘tkazib borish  bog‘lar hosildorligining ko‘tarilishiga, meva-sabzavot eksportining oshishiga xizmat qiladi.

Bu jarayonlarda ilg‘or usullarni qo‘llash ishning yana-da samarali bo‘lishida muhim ahamiyat kasb etadi. Intensiv bog‘larni parvarishlash yuzasidan mutaxassislar quyidagi tavsiyalarni taklif etadi:

Intensiv bog‘larda barcha mineral ozuqalarni suv orqali tomchilatib berish maqsadga muvofiq.

Daraxtlarni tomchilatib sug‘orishning afzalligi ozuqaning ildizga yetib borishini, o‘g‘itni o‘zlashtirish samaradorligini taʼminlaydi.

Intensiv bog‘larda 1 yoshli daraxtlar orasiga chopiq qilinadigan, sentabr oyida sug‘orilmaydigan sabzavot ekin turlarini ekish tavsiya qilinadi. Chunki daraxtlar sentabr oyida sug‘oriladigan bo‘lsa, ko‘chatni sovuq urib ketadi.

Navdaga qaraganda hosil kurtagida suv ko‘p yig‘iladi va uni sovuq urishi oson bo‘ladi. Hosil kurtagi 3 – 5 yilda shakllanib oladi. Shuning uchun kurtakni sovuqdan asrash, parvarishlash lozim.  Kurtak shakllanib olgach, uzoq yillar hosil beradi.

Intensiv bog‘ni qishki mavsumga tayyorlash, bahorgi kurtaklanish jarayoniga tayyorgarlik yuzasidan daraxtlarni kerakli ozuqalar bilan oziqlantirish muhim. Bunda daraxtlar borat kislotasi va  rux bilan oziqlantiriladi. Qish mavsumida kasalikka chalinmasligi uchun xlorogeksid, fungitsid preparatlari bilan ishlov beriladi.