Sayt test rejimida ishlamoqda!
Ishonch telefoni: 1243
Devonxona: 71 206-70-30

Qishloq xo‘jaligini mexanizatsiyalash ilmiy-tadqiqot instituti

AGRO.UZ > Qishloq xo‘jaligini mexanizatsiyalash ilmiy-tadqiqot instituti
AGRO.UZ > Qishloq xo‘jaligini mexanizatsiyalash ilmiy-tadqiqot instituti

Institut 1931-yilda tashkil topgan. 2019- yilda Qishloq xo‘jaligini mexanizatsiyalash ilmiy-tadqiqot instituti Vazirlar Mahkamasining qarori asosida Qishloq xo‘jaligini mexanizatsiyalash va elektrlashtirish ilmiy-tadqiqot instituti negizida qayta tashkil etilgan.

Muassasa mamlakatimiz qishloq xo‘jaligini mexanizatsiyalash jarayonlarining dolzarb masalalarini hal etishga qaratilgan muhim nazariy, amaliy va innovatsion tadqiqotlarni bajarish, olingan natijalarni konstruktorlik byurolari, mashinasozlik korxonalari, mashina-traktor parklari, texnik servis tashkilotlari, klasterlar, fermer va dehqon xo‘jaliklari ishlab chiqarishiga joriy qilish bilan shug‘ullanadi.

Institutning umumiy yer maydoni: maʼmuriy va laboratoriya binolari 5,2 ga maydonda joylashgan. Tajriba xo‘jaligining umumiy yer maydoni 78,9 ga, shundan dala tajribalari uchun 23,9 ga maydon ajratilgan, 55 ga maydonda chorva uchun ozuqa ekinlari ekilgan.

QXMITI tarkibiga quyidagilar kiradi:

  • 10 ta ilmiy laboratoriya va 7 ta bo‘lim;
  • 250 bosh yirik shoxli qoramolga mo‘ljallangan chorvachilik fermasi;
  • Tajriba uchastkasi;
  • Yangiyo‘l agromeliorativ texnologik parki (Toshkent viloyati);
  • Beruniy agromeliorativ texnologik parki (Qoraqalpog‘iston Respublikasi);
  • Navbahor agromeliorativ texnologik parki (Navoiy viloyati);
  • G‘uzor agromeliorativ texnologik parki (Qashqadaryo viloyati);
  • Jondor agromeliorativ texnologik parki (Buxoro viloyati);
  • Rishton agromeliorativ texnologik parki (Farg‘ona viloyati).

Institutda olib borilayotgan ilmiy-tadqiqotlar qishloq xo‘jaligi energetik vositalari hamda paxtachilik, donchilik, chorvachilik, bog‘dorchilik, sabzavot-polizchilik, kartoshkachilik va boshqa sohalarni kompleks mexanizatsiyalash darajasini oshirishga qaratilgan va quyidagi vazifalar amalga oshiriladi:

  • paxta-g‘allachilik, sabzavot-polizchilik, bog‘dorchilik va boshqa ekinlarni parvarish qilishda intensiv texnologiyalarni qamrab olgan holda qishloq xo‘jalik ekinlari yetishtirish bo‘yicha barcha agrotexnik tadbirlarni to‘liq mexanizatsiyalashni taʼminlaydigan istiqbolli mashinalashgan agrotexnologiyalar va resurslarni tejaydigan texnika vositalarini ishlab chiqish va joriy etish;
  • lalmi yerlar va cho‘l yaylovlarida don, moyli va ozuqabop ekinlar yetishtirish bo‘yicha yangi agrotexnologiyalar va texnika vositalarini yaratish va joriy etish yo‘li bilan mahsuldorligi kam yerlardan foydalanish samaradorligini oshirishga yo‘naltirilgan ilmiy tadqiqotlarni bajarish;
  • qishloq xo‘jalik mahsulotlarini yetishtirish, saqlash, tashish va qayta ishlash jarayonlarining samaradorligini, jumladan, noanʼanaviy va qayta tiklanuvchi energiya manbalari hamda axborot texnologiyalarini qo‘llash va agrotexnologik tadbirlarni kompleks avtomatlashtirish hisobiga oshirishga qaratilgan innovatsion ishlarni amalga oshirish;
  • xorijiy va mahalliy korxonalarda ishlab chiqarilgan qishloq xo‘jalik texnikasi va texnika vositalarining yangi zamonaviy turlaridan respublika qishloq xo‘jaligida samarali foydalanishga doir ilmiy asoslangan tavsiyalarni ishlab chiqish;
  • qishloq xo‘jaligi sohasida faoliyat yurituvchi boshqa ilmiy va oliy taʼlim muassasalari hamda mashinasozlik korxonalari, shuningdek, xalqaro ilmiy-tadqiqot institutlari va markazlari bilan ilmiy-texnik kooperatsiya o‘rnatish va o‘zaro hamkorlikni mustahkamlash orqali yuqori malakali kadrlar tayyorlash, ilm-fan, taʼlim va ishlab chiqarishning samarali integratsiyasini taʼminlashga qaratilgan tadbirlarni tashkil etish.

Ishonch muvaffaqiyatlar garovi! Mana shu shior bilan QXMITI bugungi kunda Jahon banki (WB), Osiyo taraqqiyot banki (ADB), GEF, TIKA (Turkiya), KOICA (Koreya), JICA (Yaponiya), GTS (Germaniya) va boshqa halqaro tashkilotlar bilan hamkorlik qilmoqda.

Jahon banki, Osiyo taraqqiyot banki va Germaniya texnik hamkorlik markazi bilan birgalikda respublika qishloq xo‘jaligiga zamonaviy energiya va resurstejamkor texnologiyalar va texnika vositalarini joriy etish hajmlarini oshirish maqsadida Qoraqalpog‘iston Respublikasi va 5 ta viloyatda “QXMITI agromeliorativ texnologik parklari” tashkil etildi.

TIKA (Turkiya) ko‘magida himoyalangan muhitda qishloq xo‘jalik ekinlarini yetishtirish bo‘yicha zamonaviy issiqxona kompleksi tashkil etildi.

KOICA (Koreya) bilan hamkorlikda soya yetishtirish hajmini oshirish bo‘yicha ishlar amalga oshirilmoqda.

JICA (Yaponiya) ko‘magida ilmiy xodimlar Yaponiyada malaka oshirib kelishyapti.

Shuningdek, Butunrossiya qishloq xo‘jaligini mexanizatsiyalash instituti (VIM, Rossiya Federatsiyasi), GOSNITI (Rossiya Federatsiyasi), Butunrossiya qishloq xo‘jaligini mexanizatsiyalash va agroximik taʼminotni informatizatsiyalash ilmiy-tadqiqot instituti (Rossiya Federatsiyasi), Volgograd agrar universiteti (Rossiya Federatsiyasi), Ukraina qishloq xo‘jaligini mexanizatsiyalash va elektrlashtirish ITI (UkrNIIMESX, Ukraina), Qozog‘iston qishloq xo‘jaligini mexanizatsiyalash va elektrlashtirish ITI (KazNIIMESX, Qozog‘iston) bilan yaxshi hamkorlik o‘rnatilgan.

QXMITI xodimlari tomonidan ixtiro va yangi ishlanmalarga 900 dan ortiq patent va mualliflik guvohnomalari olingan.

QXMITIda ilk bor ishlab chiqilgan ishlanmalar sifatida quyidagilarni keltirish mumkin:

  • dunyodagi birinchi vertikal shpindelli paxta terish mashinasi (SXM-48) [L.M.Rozemblyun patent №56291, 75225 (1937yg.), № 98810 (1950 y.)];
  • dunyodagi birinchi kanop o‘rish kombayni;
  • paxta dalalarini ikki yarusli shudgorlash texnologiyasi va ikki yarusli plug [G.M.Rudakov, patent №364279 (1967 y.)];
  • qishloq xo‘jaligi ishlab chiqarishini kompleks mexanizatsiyalash uchun Mashinalar tizimi;
  • paxtachilik uchun chopiq traktori va umumiy ishlarga mo‘ljallangan zanjirli traktor uchun agrotexnik talablar.

QXMITIda ishlab chiqilgan muhim ishlanmalar sifatida quyidagilarni keltirish mumkin:

  • kombinatsiyalashgan haydov agregati (maydalash va shudgorlash);
  • tuproqni ekishga tayyorlash va kartoshka ekishga mo‘ljallangan kombinatsiyalashgan agregat;
  • qator oralariga ishlov berish va o‘simliklarga kimyoviy dori sepishga mo‘ljallangan kombinatsiyalashgan agregat;
  • paxta dalalarida ko‘p yillik begona o‘tlarga qarshi kurashishning mexanizatsiyalashgan texnologiyasi va VKS-1,8 ildizpoyalarni yig‘ishtirish mashinasi;
  • GNU-1MS va GRP-3/5 chuquryumshatkichlari;
  • sug‘oriladigan va cho‘l hududlarida tuproqqa ishlov berish uchun aylanma va diskli pluglar;
  • ixcham lazer boshqaruvli yer tekislagich;
  • yerlarni ekishga tayyorlash uchun kombinatsiyalashgan mashina (ChYu-3,6);
  • diskli pushtaolgich-o‘g‘itsolgich;
  • kombinatsiyalashgan pushtaolgich-o‘g‘itsolgich;
  • aniq ekadigan chigit seyalkasi;
  • bir diskli don seyalkasi;
  • universal kultivator-oziqlantirgich;
  • ingichka tolali paxtalarni terish uchun paxta terish mashinasi;
  • urug‘lik paxtalarni terish uchun uchun paxta terish mashinasi;
  • dalalarni paxta qoldiqlari va g‘o‘zapoyadan tozalash texnologiyasi va mashinalar kompleksi;
  • paxta va boshqa qishloq xo‘jalik yuklarini tashish uchun ko‘p zvenoli traktor poyezdi;
  • donli ekinlarni yig‘ishtirish va yem-xashak tayyorlashda qo‘llaniladigan kichik o‘lchamli texnika vositalari.

Qishloq xo‘jaligini mexanizatsiyalash ilmiy-tadqiqot institutida 2021-yilda 4 ta innovatsiya, 1 xalqaro hamkorlikdagi va 2 ta tajriba konstruktorlik loyihalari bo‘yicha ilmiy tadqiqotlarni davom ettirish.

17 ta amaliy, innovatsion va tajriba konstruktorlik loyihalarini rasmiylashtirib, tanlovga topshirish va tanlovda g‘olib bo‘lgan loyihalar bo‘yicha ilmiy tadqiqotlarni amalga oshirish.

Institutda yaratilgan yangi resurstejamkor, fermerbop qishloq xo‘jaligi texnika va texnologiyalari haqidagi maʼlumotlarni respublika va xorijiy ilmiy jurnallar va gazetalarda doymiy ravishda eʼlon qilib borish (160 ta ilmiy maqola, 3 ta monografiya, 5 ta patent).

Raqobatbardosh yangi texnika vositalarini ishlab chiqish jarayonlariga xalqaro va xorijiy tashkilotlarning grantlarini jalb qilish.

Eng kamida 10 nafar yosh olim va ilmiy xodimlarni xorijiy ilmiy-tadqiqot va oliy taʼlim muassasalarida stajirovkadan o‘tishini taʼminlash.

Yosh olimlarni xorijiy tillarni mukammal o‘rganishlari uchun institutda o‘quv kurslarini tashkil etish va boshqalar.

Direktor: Nortayev Davron Rustamovich
Manzil: 110801, Toshkent viloyati, Yangiyo‘l tumani, Gulbahor shaharchasi, Samarqand ko‘chasi, 41 uy.
Telefon: +998-70-601-0704
Faks: +998-70-601-0704
Elektron pochta: qabulxona@uzmei.uz
Sayt: https://www.uzmei.uz/ru/admin.html

Agar siz imlo xatolarini topsangiz, iltimos, matnni tanlab, Ctrl+Enter tugmalarini bosib bizga xabar bering

Imlo xatolari haqida hisobot

Quyidagi matn tahririyatimizga yuboriladi: