O‘ZBEKISTON AGROSANOAT MAJMUASINI SUG‘URTALASH VA MOLIYALASHTIRISHNI RIVOJLANTIRISH ISTIQBOLLARI

2023-yil 25-mart kuni Toshkentda Qishloq xo‘jaligi vazirligi, Investitsiyalar va tashqi savdo vazirligi, Iqtisodiyot va moliya vazirligi hamda uning huzuridagi Sug‘urta bozorini rivojlantirish agentligi va “Swiss Re”, “Europa Re” yirik xalqaro qayta sug‘urta kompaniyalari ko‘magida “Agroinsurance-2023”  ikkinchi xalqaro konferensiyasi bo‘lib o‘tdi. Unda mahalliy va xalqaro tashkilotlardan ma’ruzachilar va mehmonlar ishtirok etishdi.

«Semurg Insurance» sug’urta kompaniyasi tomonidan tashkil etilgan konferensiyada qishloq xo‘jaligi sohasidagi sug‘urtalash, moliyalashtirish, shuningdek, investitsiyalar va xatarlarni boshqarish masalalari sessiyalar va munozaralar shaklida ko‘rib chiqildi. Unda O‘zbekiston agrosanoat sohasining barqaror rivojlanishini ta’minlashning muhim masalalari ko‘tarildi. Qishloq xo‘jaligi mamlakatimizning har to‘rtinchi aholisi band bo‘lgan yetakchi sohalardan biridir. Shu bilan birga, sanoat tashkilotlari tobora ortib borayotgani tufayli umumiy suv tanqisligi, tuproq degradatsiyasi, hashoratlar va zararkunandalarning bosqini kabi global xavflarga duch kelinmoqda.

O‘zbekiston Respublikasi Qishloq xo‘jaligi vaziri o‘rinbosari Umid Mamadaminov o‘z nutqida shunday dedi:

— O‘zbekiston qishloq xo‘jaligini rivojlantirishning 2020-2030-yillarga mo‘ljallangan Strategiyasida agrar va oziq-ovqat sohasining tegishli yo‘nalishlarini sug‘urtalash va kreditlash mexanizmlarini takomillashtirish bo‘yicha bandlar nazarda tutilgan. O‘zbekistonda 90 ming nafarga yaqin fermer xo‘jaliklari, 500 ming nafardan ortiq dehqon va 5 millionga yaqin yordamchi xo‘jaliklar faoliyat ko‘rsatmoqda. Barcha meva-sabzavot mahsulotlarining qariyb 70 foizi ularning hududlarida yetishtiriladi. Tez o‘zgarib borayotgan dunyoda oziq-ovqat xavfsizligini mustahkamlash masalalari juda dolzarbdir. Hozirgi kunda butun respublika bo‘ylab intensiv bog‘lar barpo etish va sabzavotchilikni rivojlantirish bo‘yicha loyihalar faol amalga oshirilmoqda. Shu sababli, yaratilgan bog‘lar, uzumzorlar va ekinlarni sug‘urtalash masalasi juda dolzarbdir. Qishloq xo‘jaligi bilan shug‘llanishda ham xavflar mavjud. Soha ishlab chiqaruvchilari uchun mulkni va yetishtirilgan qishloq xo‘jaligi mahsulotlarini o‘z vaqtida sug‘urtalash muhimdir. Axir, sug‘urta tabiiy ofatlar va ular tufayli yuzaga kelishi mumkin bo‘lgan zararni qoplash kafolatlarini beradi.

Bundan tashqari, konferensiya davomida dunyoning ko‘plab mamlakatlarida muvaffaqiyatli sinovdan o‘tgan qishloq xo‘jaligi xavfini boshqarishga majmuaviy yondashuv muhokama qilindi. Ushbu majmuaviy yondashuvning asosi yangi texnologiyalarni qo‘llash, qishloq xo‘jaligini sug‘urtalash va fermer xo‘jaliklarining moliyalashtirishga kirishini soddalashtirishdir. «Qishloq xo‘jaligida sug‘urta» sessiyasida qishloq xo‘jaligi xatarlarini sug‘urtalashni himoya qilish sohasidagi istiqbolli masalalar ko‘rib chiqildi. Ma’ruzachilar va ishtirokchilar qishloq xo‘jaligi xavfini boshqarishda integratsiyalashgan yondashuvda qishloq xo‘jaligini sug‘urtalashning yetakchi roli haqida fikr-mulohazalarini bildirishdi.

Bugungi kunda qishloq xo‘jaligini sug‘urtalash agrar sohaning barqaror rivojlanishini ta’minlaydigan dunyodagi yagona ishonchli vositadir. To‘g‘ridan-to‘g‘ri fermerlarga to‘lanadigan pul kompensatsiyasi hosilning nobud bo‘lishi oqibatlarini bartaraf etishga va o‘z biznesini tiklashga yordam beradi.

Jasurbek Abdullajonov, “Semurg‘ Insurance” kompaniyasi bosh direktor o‘rinbosari:

—  O‘zbek fermerlarining sug‘urtaga bo‘lgan qiziqishi katta klasterlarda ham, kichik dehqon-fermer xo‘jaliklarida ham ortib borayotganiga aminmiz. Ushbu konferensiyaning maqsadi qishloq xo‘jaligi ishlab chiqaruvchilari bilan sug‘urta ularga hosil yetishmovchiligidan yetkazilgan zararni qanday qoplashi va o‘z biznesini davom ettirish va hatto kengaytirishga yordam berishini muhokama qilishdir. “Semurg‘ Insurance” Agrosug‘urta dasturi bo‘yicha to‘lovlar eng yirik xalqaro qayta sug‘urtalovchi “Swiss Re” bilan hamkorlik tufayli kafolatlanganligini ta’kidlayman, uning ishonchlilik reytingi juda yuqori. Bunday xalqaro hamkorlik hatto so‘nggi paytlarda qishloq xo‘jaligida ko‘p uchraydigan katta zararlar uchun to‘lovlarni kafolatlaydi.

Konferensiya ishtirokchilari yaqin kelajakda eng muhim vazifalardan biri sifatida qishloq xo‘jaligi ishlab chiqaruvchilari uchun moliyalashtirishni ko‘paytirish choralarini aniqladilar. «Qishloq xo‘jaligiga investitsiyalar» sessiyasida xalqaro amaliyotda keng qo‘llaniladigan O‘zbekiston uchun noyob moliyaviy vosita taqdim etildi. Bu sug‘urtalangan kelajakdagi hosilni qishloq xo‘jaligi biznesini rivojlantirish uchun kredit olishda garov sifatida ishlatishdir. Bunday dastur fermerga nafaqat mavsumiy ishlarni bajarish uchun, balki ekin maydonlari va texnik ta’minotni ko‘paytirish uchun ham kredit olishga imkon beradi. Shu bilan birga, sug‘urtalangan qishloq xo‘jaligi ekinlarining kelajakdagi hosilini garovga qo‘yishdan boshqa garov talab qilinmaydi.

Konferensiya ishtirokchilari muhokama qilingan mavzularga katta qiziqish bildirishdi va ma’ruzachilarga: himoya qilish, xalqaro qayta sug‘urta kompaniyalarining kafolatlari, kredit olishda sug‘urtaning roli, xalqaro fondlardan subsidiyalar olish imkoniyati va boshqa masalalar bo‘yicha bir qancha savollarni berishdi.

“AgroInsurance-2023” konferensiyasi — mahalliy agrosanoat majmuasining barqaror ishlashini ta’minlash va ichki va xalqaro investitsion jozibadorligini oshirishning muhim masalalarini ko‘tardi. Bu yerda O‘zbekiston Respublikasi qishloq xo‘jaligini rivojlantirish strategiyasini amalga oshirishga ko‘maklashishga qaratilgan samarali yechimlar muhokama qilindi.

Rasmiy saytimiz va telegram kanallarimizda sug‘urta mavzusi haqida avval ham yozgan edik. Jumladan, “Bog‘lar va uzumzorlarni qanday sug‘urtalash”, shuningdek, “Qishloq xo‘jaligi texnikasini sug‘urtalashning iqtisodiy mexanizmlari va kafolatlari” mavzusidagi maqolalarimiz  bilan ushbu havolada tanishishingiz mumkin.