YIL DAVOMIDA REDISKA YETISHTIRISH MUMKINMI?

Bugungi kunda aholining sabzavot ekinlariga bo‘lgan talabini qondirish dolzarb ahamiyat kasb etmoqda. Shu nuqtai-nazardan har qanday ob-havoda ham yil davomida ekib hosil olish mumkin bo‘lgan sabzavot turlari mavjud. Bu inson organizmi uchun juda foydali sabzavotlardan biri rediskadir.

Rediska dunyodagi koʻpgina dehqonchilik mintaqalarida ochiq va yopiq (himoyalangan) yerlarda oʻstiriladi. O‘zbekiston sharoitida rediska yetishtirishning o‘ziga xos ilmiy tajribasiga mavjud. Bu borada Qashqadaryo ilmiy tajriba stansiyasi jamoasi rediskani yilning 365 kuni davomida issiqxona bo‘lmalarida yetishtirib hosil olishni sinovdan o‘tkazdi. Jumladan, joriy yil 25-yanvar kunida rediskaning “Selesta” navini  zamonaviy issiqxona bo‘lmalarida 5×5 sxemasida ekishdi. Qayd etilishicha, bu ertapishar navlarining o‘suv davri 30-35 kunni tashkil etadi.

Issiqxonaga ekilgan rediskaning afzalliklari mavsum tanlamasligi, kasallik va zararkunandalarga chalinmasligi, suvning tejamkorligi hamda keyingi sabzavot ko‘chatlariga o‘z o‘rnini bo‘shatib berishligi bilan ajralib turadi.  Yana bir muhim jihati kundalik iste’mol uchun ko‘p qavatli binolarda, hovlilarda  maxsus joylar tashkil qilib qisqa va tez muddatda rediska yetishtirib  olish  mumkin.

Sirojiddin To‘rayev Qashqadaryo ilmiy tajriba stansiyasi ilmiy ishlar va innovatsiyalar bo‘yicha direktor o‘rinbosari:

— Qashqadaryo ilmiy tajriba stansiyasi ko‘chatxonasida bitta tajriba o‘tkazdik. Rediskani “Selesta” navini ekib parvarishladik. Ko‘p qavatli uy sharoitida yashaydiganlar, bemalol maxsus tokchalar yasab, unda 10 sm chuqurlikdagi ozuqali muhitni yaratib yil davomida rediska yetishtirsa bo‘ladi. Agar tavsiya beradigan bo‘lsak, ko‘p qavatli uylarda  ko‘chirish uchun  qulay bo‘lgan maxsus bo‘lmalarni  quyosh tushub turadigan joylarga qo‘yish kerak bo‘ladi.