AZIZ VOITOV SAMARQAND VILOYATIDAGI BIR NECHTA QISHLOQ XO‘JALIGI OBYEKTLARIGA TASHRIF BUYURDI

2022-yil 3-4-sentyabr kunlari O‘zbekiston Respublikasi qishloq xo‘jaligi vaziri Aziz Voitov boshchiligidagi Ishchi guruhi Samarqand viloyatining bir qator tumanlariga tashrif buyurdi. Qishloq xo‘jaligiga mo‘ljallangan obyektlarga tashrif doirasida tadbirkorlarning muammo va takliflari tinglanib, zarur masalalar yuzasidan tegishli vazifalar belgilab olindi.

Ishchi guruhning ilk tashrif manzili Oqdaryo tumanidagi “Gren Koreya Agro invest & GS-Bio Samarkand” o‘zbek-koreys qo‘shma korxonasi bo‘ldi.  Bugungi kunda korxonaning 6,5 gektarlik issiqxona xo‘jaligida Koreyadan in-vitro usulida yetishtirilgan onalik kartoshka ko‘chatlari olib kelinib, parvarishlanmoqda.

Bu yerda ishchi guruhi 2022-yil 12-sentyabr yakuniga qadar ishga tushirilishi mo‘ljallanayotgan in vitro laboratoriyasi inshootlariga tegishli qurilish ishlari bilan tanishib chiqdi. Mazkur chora-tadbirlar uchun 6 mln AQSH dollaridan iborat investitsiya mablag‘lari ajratilgan. Joriy yil oktyabr oyining oxiriga qadar 1,62 mln AQSH dollarilik xorijiy investitsiyalar hisobiga 40 tonnalik 2 ta konteynerda qo‘shimcha laboratoriya uskunalari olib kelinadi. 2023-yilning iyun oyiga kelib esa Samarqand viloyatidagi kartoshka urug‘ligiga bo‘lgan talabni sifatli super elita avlodli urug‘lar bilan to‘liq taʼminlash rejalashtirilgan.

Taʼkidlash kerak, 2022-yilda Oqdaryo tumanida 81 gektar asosiy maydonga G3 avlodli 2400 tonna kartoshka urug‘lari hamda 60 gektar takroriy maydonga 1200 tonna kartoshka urug‘lari ekildi. Bu esa 2023-yil hosili uchun super elita urug‘lik kartoshka zahirasini yaratish imkonini beradi.

Keyingi manzil Toshkent davlat agrar universitetining Samarqand filiali bo‘ldi. 2022-20223-yilda TDAUning Samarqand filialida 1470 nafar talaba tahsil olayotgan bo‘lsa, ulardan 650 nafari birinchi bosqich talabalaridir.  Vazir Aziz Voitovga filialning moddiy–texnik bazasi, yangi o‘quv yiliga tayyorgarlikning borishi, professor – o‘qituvchilarning ilmiy salohiyati hamda istiqboldagi ilmiy va amaliy loyihalar tanishtirildi.

O‘z navbatida vazir taʼlim jarayonining ilm-fan bilan uzviyligini taʼminlash, raqobatbardosh, zamonaviy va kreativ fikrlaydigan kadrlarni tayyorlash bo‘yicha masʼullarga tegishli ko‘rsatma va tavsiyalar berdi.

Shuningdek, ishchi guruhiga filial hududida qurilishi rejalashtirilayotgan Qishloq xo‘jaligida bilim, innovatsiyalar va xizmatlar markazi (AKIS)ning Samarqand bo‘limi faoliyatini yo‘lga qo‘yish bo‘yicha olib borilayotgan ishlar namoyish etildi.

Jomboy tumanida joylashgan “Sag agro” MCHJ korxonasidagi o‘rganish ishlari davomida 18 gektardan ortiq yer maydonida O‘zbekistonda uchramaydigan yoki noyob 65 xil mevali daraxt ko‘chatlari, onalik materiallari  olib kelinib parvarish qilinayotgani maʼlum bo‘ldi. Muassasa laboratoriyasida turli kasallik va zararkunandalardan holi bo‘lgan hamda qurg‘oqchilikka chidamli, mahalliy turli iqlim sharoitiga mos navlarning klon payvandtaglari va payvandlangan ko‘chatlari yetishtirilmoqda. Qayd etilishicha, laboratoriyaning 10 dan ortiq biotexnolog, agronom va agrokimyo xodimlari Turkiya davlatining bir qator in vitro laboratoriyalarida malaka oshirib qaytishgan.

Vazir Aziz Voitov ushbu korxona mutasaddilariga fitopatologiya laboratoriyasini kengroq yo‘lga qo‘yish, bu borada vazirlik huzuridagi ilmiy-tadqiqot institutlari bilan yana-da yaqinroq hamkorlik qilish, qolaversa, nafaqat mevali daraxt ko‘chatlari, balki ko‘rgazmali daraxtlar va gulchilikni rivojlantirish borasidagi takliflarini bildirib o‘tdi, narxni shakllantirish masalasida esa xaridorlar manfaatlarini inobatga olish zarurligini taʼkidlab o‘tdi.

Samarqand viloyati Bulung‘ur tumanida Ishchi guruhi “Metin group impeks” MCHJ korxonasi tomonidan O‘zbekiston va Do‘stlik massivlarida tashkil etilgan sig‘imi 8000 tonna meva-sabzavotlarni uzoq muddatli saqlaydigan sovutkich-muzlatgich omborxonalarini ko‘zdan kechirdi. Bu yerda 120 gektar maydonda “Kishmish”, “So‘g‘diyona” va “Rizamat ota” nomli mashhur uzum navlari yetishtiriladi, shuningdek, mayiz mahsulotlari tayyorlanadi. 2022-yilda mazkur korxonada meva-sabzavotlarni quritish liniyalari import qilingan bo‘lib, yil yakuniga qadar ushbu uskunalarni ishga tushirish rejalashtirilgan.

Xuddi shu tumanda vazir boshchiligidagi ishchi guruhiga 2016-yildan buyon ishlab kelayotgan “Samarqand Garden Plast” MCHJ korxonasi faoliyati namoyish etildi. Ushbu korxonaning asosiy yo‘nalishlaridan biri, meva-sabzavot mahsulotlarini shok usulida muzlatish hamda kalibrovka yordamida qadoqlashdan iborat.

Aziz Voitov shuningdek, Samarqand viloyatining Ishtixon tumaniga tashrif buyurib, tumandagi “Humoyinshox”, “Asalchi Eldor” fermer xo‘jaliklari, “Maroqand sifat tekstil” MCHJ klaster korxonasi, unga tegishli paxta qabul qilish maskani bilan tanishdi.

So‘ng bamiya dorivor o‘simligi ekilgan 3 gektarlik maydon ko‘rsatildi. Ushbu yer maydonlari “Asalchi Eldor” fermer xo‘jaligiga tegishli bo‘lib, qishloq xo‘jaligi faoliyati bilan shug‘ullanish uchun aholiga 15 sotixdan bo‘lib berilgan.

“Maroqand sifat tekstil” MCHJ klaster korxonasida ishchi guruhi tomonidan paxta hig‘im-terimiga tayyorgarlik, bo‘lg‘usi hosilni chamalash jarayoni, traktorlar va texnikalarning mavsumga shayligi ko‘zdan kechirildi. Shuningdek, klaster korxonasida 2023-yil hosili uchun jamg‘arilgan urug‘lik g‘alla, mineral o‘g‘itlar va kimyoviy vositalar zaxirasi yaratilganligi ko‘rsatildi.