VAZIR FARG‘ONALIK GULCHILAR BILAN UCHRASHDI

Qishloq xo‘jaligi vaziri Aziz Voitov ishchi tashrif bilan Farg‘ona viloyatida bo‘ldi.

Tashrifdan ko‘zlangan asosiy maqsad — hududda qishloq xo‘jaligi sohasida amalga oshirilayotgan islohotlarning ijrosini ko‘zdan kechirish, yangi tashabbuslar bilan tanishish va aholi daromadlarini oshirish bo‘yicha qilinayotgan amaliy ishlarga ko‘maklashishdan iborat.

Dastlab Aziz Voitov Farg‘ona shahridagi 101 gektarda tashkil etilgan atirgulchilik kooperatsiyasi bilan tanishdi.

Loyiha qiymati 1,2 mlrd so‘m bo‘lgan kooperatsiyaga 150 nafar dehqon doimiy asosda biriktirilgan bo‘lsa, 500 nafar ishchi mavsumiy faoliyat yuritadi. Hududda 85 ta oila tomonidan atirgulning 400 xildan ortiq navi ekilib parvarishlanmoqda. Albatta, daromad ham shunga yarasha. Yil davomida 30 million dona atirgul ko‘chatlari ekilib, eksport va mahalliy bozorga yo‘naltiriladi. Umumiy kooperatsiyaning 2 yillik daromadi 30 million dollarga yetkazilishi nazarda tutilgan.

Yer bilan tillasha olgan, dehqonchilikning sir-asroridan xabardor Farg‘ona ahlining shijoati baland, daromad olishga bo‘lgan intilishi esa sezilib turibdi.

Aziz Voitov kooperatsiyaga a’zo oilalar bilan muloqot qilar ekan, ularning kelgusidagi rejalari, tashabbuslari bilan qiziqdi. Suhbat davomida atirgul ko‘chatlarini yetishtirishdan tortib uni eksport qilishgacha bo‘lgan jarayonda Qishloq xo‘jaligi vazirligi har qanday amaliy yordamga tayyor ekanligi ta’kidlandi.