AGROBIZNESGA QIZIQQAN XOTIN-QIZLARNING MALAKASI OSHIRILMOQDA

Joriy yil 20 fevral kuni Toshkent viloyati, Yuqori Chirchiq tumanidagi Qishloq xoʻjaligida bilim va innovatsiyalar milliy markazi (AKIS)da Qishloq xoʻjaligi vazirligi, Oʻzbekiston “Agrar soha ayollari” uyushmasi, Xalqaro taraqqiyot va tiklanish banki hamda Xalqaro taraqqiyot assotsiatsiyasi ishtirokida “Oʻzbekiston qishloq xoʻjaligi modernizatsiyasi” loyihasi doirasida seminar-trening tashkil etildi.

Unda oʻz shaxsiy tomorqasi va xonadonlaridagi yer maydonida qishloq xoʻjaligi mahsulotlarini yetishtirishga qiziqishi bor xotin-qizlarga agrar sohadagi yangiliklar, xususan, issiqxonalardan qanday foydalanish, qishloq xoʻjaligi mahsulotlarining hosildorligini oshirishda eʼtibor qaratish lozim boʻlgan jihatlar xususida muhim maʼlumotlar berilmoqda.

Bugungi kunda O‘zbekistonda 7 ming gektarga yaqin issiqxonalar bor. 2022 yilda ularda 300 ming tonnadan ortiq maҳsulot yetishtirildi.

Bu yo‘nalishni rivojlantirish maqsadida so‘nggi yillarda 10 dan ortiq normativ-ҳuquqiy ҳujjatlar qabul qilindi. O‘zbekiston Respublikasi Prezidentining “Issiqxona xo‘jaliklari faoliyati samaradorligini oshirish yuzasidan qo‘shimcha chora-tadbirlar to‘g‘risida”gi qarori, O‘zbekiston Respublikasi Vazirlar Maҳkamasining “Issiqxona xo‘jaliklari faoliyatini qo‘llab-quvvatlash bo‘yicha qo‘shimcha chora-tadbirlar to‘g‘risida”gi qarorlari shular jumlasidandir.

Seminarda aytib oʻtilganidek, qishloq xoʻjaligi mamlakatimiz iqtisodiyotining eng yirik tarmoqlaridan biri hamda respublikaning iqtisodiy-ijtimoiy barqarorligida muhim ahamiyatga ega. Toshkent viloyatida sugʻoriladigan 384.5 ming gektar yerning 57.4 ming gektarini tomorqa xoʻjaliklari tashkil etadi. Uy xoʻjaliklari mamlakat oziq-ovqat xavfsizligini taʼminlash bilan bir qatorda, keng aholi qatlamlari, birinchi navbatda ayollarni agrobiznesga jalb qilishga xizmat qiladi.

Shuni alohida aytib oʻtish kerakki, hozirgi kunda mamlakatda oziq-ovqat xavfsizligini taʼminlash, issiqxona xoʻjaliklarini moliyaviy sogʻlomlashtirish, eksportbop va raqobatbardosh qishloq xoʻjaligi mahsulotlarini uzluksiz yetishtirish hamda qishloq joylarida aholi bandligini taʼminlash va daromad olishga yanada qulay sharoit yaratish maqsadida Davlat tomonidan 20 dan ortiq qonun hujjatlari qabul qilingan boʻlib, unda bir qator imkoniyatlar, imtiyozlar, preferensiyalar belgilab qoʻyilgan.

Oʻzbekistonning iqlim sharoiti himoyalangan yerlar sabzavotchilikni rivojlantirish uchun juda qulay. Birgina 2021 yilning oʻzida 797 gektar maydonda qiymati 2,3 trillion soʻmlik 398 ta zamonaviy issiqxona ishga tushirilgani ham fikrimiz tasdigʻidir. Intensiv va uzoq davom etadigan quyosh radiatsiyasi oqimi himoyalangan yerlarda sabzavot ekinlarini yil boʻyi, nisbatan qisqa (3,5-4 oy) davom etadigan isitish mavsumlarida ham yetishtirish imkonini beradi. Shu tufayli sabzavotlarni bunday yetishtirish yilning sovuq davrlarida ularni ishlab chiqarishni taʼminlaydigan xoʻjalik faoliyatining foydali yoʻnalishlaridan biri hisoblanadi. Bu esa, oʻz navbatida, aholining ovqatlanish sifatini yaxshilashga hamda fermer, dehqon va shaxsiy tomorqa xoʻjaliklari daromadini oshirish imkonini beradi.

5 kun davom etadigan seminar-treningda qiziqishi bor xotin-qizlar zamonaviy texnologiyalar asosida xorij tajribasini qoʻllagan holda issiqxonalarda qishloq xoʻjaligi mahsulotlarini yetishtirishga oʻrgatiladi.

Oʻquv seminarlarini Toshkent davlat agrar universitetining professor oʻqituvchilari olib bormoqda. Shuningdek, treninglarda Turkiyaning qishloq xoʻjaligi va issiqxonalarni rivojlantirish boʻyicha malakali mutaxassislari oʻz tajribalari bilan oʻrtoqlashishi koʻzda tutilgan Seminar-trening davomida amaliy mashgʻulotlar ham oʻtkazilmoqda.