YANGI QISHLOQ XO‘JALIGI MASHINALARI FAO VAKILLARI E’TIBORIDA

2023-yilning 31-yanvar kuni BMT Oziq-ovqat va qishloq xo‘jaligi tashkiloti (FAO)ning O‘zbekistondagi vakolatxonasi vakillari O‘zbekiston Respublikasi Qishloq xo‘jaligi vazirligi huzuridagi Qishloq xo‘jaligini mexanizatsiyalash ilmiy-tadqiqot institutiga tashrif buyurishdi.

Ular ilmiy-tadqiqot institutida olib borilayotgan ishlar, minimal texnologiyalar asosida mahsulot yetishtirishga mo‘ljallangan qishloq xo‘jaligi mashinalarining yangi namunalari bilan tanishdilar.

Ikki tomonlama uchrashuvda:

• dunyoda ro‘y berayotgan global iqlim o‘zgarishi;
• tuproq unumdorligini saqlash, yer va atrof muhitni muhofaza qilish;
• qishloq xo‘jaligi sohasida xorij tajribalarini o‘rganish, yosh olimlarning tajribasini oshirish;
• tuproqqa minimal ishlov berish, cho‘l-yaylovlardan unumli foydalanish kabi mavzular muhokama etildi.

Shuningdek, uchrashuv yakunida tomonlar sohadagi muammolarni bartaraf etish, zamonaviy qishloq xo‘jaligi texnikalaridan samarali foydalanish bo‘yicha hududlarda seminar-treninglar o‘tkazish hamda o‘zaro hamkorlikda maqsadli loyihalarni amalga oshirishga kelishib olishdi.