“E-IJARA” AXBOROT TIZIMINING YANGI “FRONTEND” QISMI ENDI YANADA QULAY

Xabaringiz bor, qishloq xo‘jaligi yerlari, jumladan dehqon xo‘jaligini yuritish uchun yer uchastkalarini ochiq elektron tanlov orqali ijaraga berish mexanizmi joriy etilgan. Bunda qator vazirlik va idoralarning o‘zaro integratsiya qilingan axborot tizimlari va maʼlumotlari bazalaridan keng foydalanilmoqda.

Maʼlumot uchun: O‘zbekiston Respublikasi Qishloq xo‘jaligi vazirligining qishloq xo‘jaligiga mo‘ljallangan yer uchastkalarini ijaraga berish bo‘yicha materiallarni to‘plash, ko‘rib chiqish va vakolatli organlar hamda tashkilotlar bilan kelishishni amalga oshirishga mo‘ljallangan “E-IJARA” avtomatlashtirilgan axborot tizimi 2021-yil 23-dekabrdan ishga tushirilgan. Mazkur tizim ochiq elektron tanlovlarni o‘tkazish maqsadida lotlarni “E-AUKSION” elektron savdo platformasiga chiqarish, shuningdek g‘oliblarning huquq va hujjatlarini tegishli idoralarda rasmiylashlashtirishga ko‘maklashish uchun foydalanilmoqda.

Fuqarolar tomonidan ijtimoiy tarmoqlar va murojaatlarda berilgan takliflarni inobatga olgan holda barcha foydalanuvchilar uchun ochiq bo‘lgan “E-IJARA” axborot tizimining yangi frontend qismi vazirlik huzuridagi “Agrosanoatni raqamlashtirish markazi” DM tomonidan ishlab chiqildi. Zamonaviy dizayn va foydalanuvchi uchun qulay vositalardan iborat interfeysli tizim www.e-ijara.uz saytida joylashtirildi.

Yaratilgan qulayliklar tizimda foydalanuvchining qimmatli vaqtini tejash bilan birga, kutilgan natijaga erishishni oson tarzda  amalga oshirish imkonini beradi, jumladan:

• tanlovdagi yer maydonlari to‘g‘risida batafsil maʼlumot olish mumkin. Bular qatoriga lot raqami, kadastr raqami, maydoni, hududi, yer uchastkasi holati, ijara turi va muddati, ixtisosligi, ball boniteti, yerning sho‘rlanish darajasi, suv bilan taʼminlanganligi hamda normativ qiymati va boshqa parametrlarni kiritgan holda izlash imkoniyati kiradi. Bunda yerning ixtisosligi muhim ahamiyat kasb etib, avval tanlovlarga qo‘yilgan yer uchastkalarini ixtisoslik bo‘yicha ajratishni lotlarga biriktirilgan hujjatlarni ochmagan holda amalga oshirish mumkin; Videorolikni ko‘rish;
• yer maydoni foydalanuvchiga maʼqul kelgan taqdirda “bayroqcha” tugmasi orqali shaxsiy kabinetga tanlangan yerlar ro‘yxatida saqlash mumkin. Keyinchalik kabinetga kirib, tanlangan yerni ijaraga olish bo‘yicha tanlovda ishtirok etish faoliyatini davom ettira oladi; Videorolikni ko‘rish;
• kengaytirilgan qidiruv instrumenti yer maydonini yuqorida sanab o‘tilgan mezonlar kesimida filtrlash imkonini beradi. Bu afzallik foydalanuvchiga zarur bo‘lgan yerni tanlashda qidiruv menyusiga istalgan maʼlumotni kiritish orqali izlash qulayligi bilan izohlanadi. Videorolikni ko‘rish;

2022 – 2025-yillarda paxta va g‘alladan qisqartirilgan hamda aholi punktlariga yaqin va suv taʼminoti yaxshi bo‘lgan 200 ming gektar ekin maydonlarini aholiga ochiq elektron tanlov orqali ijaraga berish bo‘yicha “E-IJARA” axborot tizimining yangi frontend qismi va dizayni foydalanuvchi uchun maksimal darajada qulay ishlab chiqilgan.

Tizimning ochiq va shaffofligini taʼminlashda muhim bo‘lgan jihat – yer maydonini ochiq xaritada ko‘rish orqali foydalanuvchi ranglar bilan ajratilgan bo‘sh yoki mulkdori bo‘lgan yer maydoni, loyihalash, tanlovdagi, g‘olib aniqlangan va taklif kiritilgan kabi statuslardagi yer maydonlari to‘g‘risida aniq va onlayn rejimida yangilab boriladigan maʼlumotni qo‘lga kiritadi.

Mazkur xarita ommabop bo‘lgan 3 xil Satelite, Hybrid va Street ko‘rinishlarida aks ettirilgan, yaʼni ular orqali tanlangan yer maydonlarining chegarasi, avtomobil yo‘llari, aholi yashash punktlari joylashgan hududlar to‘g‘risida batafsil maʼlumot olish mumkin. Videorolikni ko‘rish;

Yer maydonlarining barchasi kontur ko‘rinishida va har bir yer haqida identifikatsiya maʼlumotlari foydalanuvchiga taqdim etiladi.  Xaritada keltirilgan qulayliklar qatorida yer maydoni uzunligini o‘lchash funksiyasi ham kiritilgan.  Uning yordamida tanlangan yer uchastkasidan eng yaqin aholi punkti yoki avtomobil yo‘ligacha bo‘lgan masofani o‘lchash mumkin, bu esa joyiga chiqmagan holda yerning geofazoviy joylashuvini aniqlash va eng qulay marshrutni tanlash imkonini beradi.

Yana bir muhim afzallik – maʼqul kelgan yer maydonining o‘zida “tanlovda ishtirok etish” tugmasini bosib, to‘g‘ridan-to‘g‘ri “E-AUKSION” savdo platformasiga o‘tish imkoniyati mavjud, Videorolikni ko‘rish;

So‘ngra foydalanuvchi yer maydoni, tanlov g‘olibining majburiyatlari va  yer uchastkasidan foydalanish shartlari va tartibiga taaluqli boshqa talablar bilan tanishib chiqishi va tanlovda ishtirok etish uchun ariza qoldirishi mumkin. Natijada fuqarolar o‘zlariga maʼqul bo‘lgan yer uchastkasini nafaqat auksionda qatnashish orqali ortiqcha ovoragarchiliklarsiz yutib olishi mumkin, balki yer ijarasi bilan bog‘liq jarayonni shaffof va oshkora tizimda amalga oshirishga erishadi.

Ko‘p beriladigan savollarga javoblar aks ettirilgan maʼlumotlar haqidagi videoroliklar  hamda normativ-huquqiy hujjatlar va foydali xavolalar bo‘limi ham yaratilgan.

Hozirga qadar ochiq elektron tanlovlarda 81,7 ming gektar yer maydonlarining (381,8 ming lot) g‘oliblari aniqlandi. Shundan tanlovga qo‘yilgan 20,9 ming gektar yer maydonlari bo‘yicha 88 ming nafar ro‘yxatda turgan ehtiyojmand oilalar, 4,2 ming gektar bo‘yicha esa 22,1 ming nafar xorijdan qaytgan mehnat migrantlari g‘olib bo‘lgan.