Tok novdalarini sovuq urdi. Shu novdalarni nima qilish kerak. Qanday ishlov bersa bo‘ladi?

Akademik M.Mirzayev nomidagi bog‘dorchilik, uzumchilik va vinochilik ilmiy-tadqiqot instituti tok tuplari va novdalarini sovuq urishi va ularni qayta tiklash bo‘yicha quyidagi tavsiyalarni beradi.
Qishda 2023-yil 9-yanvarda bo‘lgan qora sovuq ko‘milmagan tok tuplariga jiddiy zarar yetkazdi, ba’zan hollarda tokning yer ustki qismini nobud qildi. Qishki sovuqdan zararlangan tok tuplarini tiklash maqsadida, quyidagi ishlarni amalga oshirish zarur:
– qishki sovuqdan zararlangan tok tuplari ildiz bo‘g‘zi atrofini yer yuzasidan 5 sm chuqurlikda qazish va tok tuplarini kesish; (bunda tok tupining yashirin kurtaklaridan rivojlangan novdalar, shuningdek, qo‘ltiq novdalarining kuchli rivojlanishi hisobiga tok tupini tiklash imkoniyatini beradi).
– tok tupi atrofining yer yuzasidan 10-15 sm chuqurlikda 100-150 g dan azotli o‘g‘it har bir tupga solinishi;
– tok tupidan qochirib ariq olish va yaxshilab, singdirib sug‘orish tavsiya etiladi.
Shuningdek, zararlangan tok tuplari yer ustki qismini tiklash uchun ularni qo‘shimcha oziqlantirish va sug‘orish, hamda novdalar uchini barvaqt chilpish zarur tadbirlar ekanligi ma’lum qilinadi.