Qishloq xo‘jaligi vazirligi yetishtirilgan mahsulotlar hajmini joylardagi statistika qo‘mitalaridan oladimi?

Sizning Qishloq xo‘jaligi vazirligining rasmiy veb saytidagi elektron chat orqali yuborgan savolingizga shuni ma’lum qilamizki,
2021-yil 11-avgustda qabul qilingan O‘zbekiston Respublikasining “Rasmiy statistika to‘g‘risida”gi Qonuniga muvofiq O‘zbekiston Respublikasi Prezidenti huzuridagi statistika agentligi (avvalgi Davlat statistika qo‘mitasi) rasmiy statistika sohasidagi vakolatli davlat organi hisoblanadi. Shunga ko‘ra, O‘zbekiston Respublikasi Qishloq xo‘jaligi vazirligi sohadagi islohotlar samaradorligini tahlil qilishda va tegishli qarorlarni ishlab chiqishda qishloq, o‘rmon va baliq xo‘jaligiga oid ayrim rasmiy statistik ma’lumotlardan foydalanadi.
Shuningdek, xo‘jalik yurituvchi subyektlar, jumladan, qishloq xo‘jaligi faoliyati bilan shug‘ullanuvchi korxona va tashkilotlar o‘z faoliyatlari to‘g‘risida bevosita statistika organlariga statistika hisobotini taqdim etadilar. Qishloq xo‘jaligi vazirligi ushbu korxonalar hisoboti asosida statistika organlarida shakllangan va jamlangan statistik ma’lumotlar, qishloq xo‘jaligi va iqtisodiyotning boshqa sohalariga oid statistik byulletenlar, press-relizlar hamda statistika agentligining rasmiy veb-saytiga muntazam joylashtirib boriladigan ochiq ma’lumotlaridan o‘z xizmat faoliyati davomida foydalanib keladi.
Bundan tashqari, hududlarning qishloq, o‘rmon va baliq xo‘jaligi sohasidagi o‘zgarishlarini tahlil qilib borishda hamda ma’lumotlarning haqqoniyligi va shaffofligini ta’minlash maqsadida hududiy qishloq xo‘jaligi boshqarmalari bilan hududiy statistika organlari o‘rtasida ham o‘zaro ma’lumot almashinuvi yo‘lga qo‘yilgan.