XALQARO QISHLOQ XO‘JALIGI UNIVERSITETIDA OCHIQ ESHIKLAR KUNI

2023-yilning 7-aprel kuni Xalqaro qishloq xo‘jaligi universitetida (IAU) “Ochiq eshiklar kuni” bo‘lib o‘tdi. Ishtirokchilar ro‘yxatga olinganidan so‘ng universitet talabalar shaharchasi bo‘ylab ekskursiya uyushtirildi va ma’ruzalar zalida o‘quv dasturlari taqdimoti va IAU professor-o‘qituvchilari bilan tanishuv bo‘lib o‘tdi. Tadbirda Toshkent shahridagi litsey, kollej o‘quvchilari, shuningdek, umumta’lim maktablari o‘quvchilari ishtirok etdi.

Ekskursiya davomida yoshlar auditoriyani katta qiziqish bilan ko‘zdan kechirdilar, ma’ruza jadvali, o‘quv jarayoni haqida savollar berdilar. Tadbir ishtirokchilari orasida Toshkent davlat agrar universiteti qoshidagi litsey o‘quvchilari ham ta’lim muassasasi salohiyatini ko‘rish, universitet dasturlari bilan yaqindan tanishishga alohida qiziqish bildirdi.

Maʼruzalar zalida barcha yigʻilganlarga universitetning oʻzi haqida batafsil maʼlumot berildi, shuningdek, xorijlik professor-oʻqituvchilar bilan tanishtiruv boʻldi. Taqdimotda universitetdagi o‘quv dasturlari, qabul talablari va grant imkoniyatlari haqida ham so‘z yuritildi.

– Biz bugun universitetimiz devorlarida ko‘plab salohiyatli yoshlarning dasturlarimiz bilan tanishishlari, o‘qituvchilarimiz bilan uchrashishlari va kampusimizni ko‘rayotganidan juda mamnunmiz, – deydi IAU Abituriyentlarni qo‘llab-quvvatlash markazi katta menejeri Shaxriyor Sa’dullayev.

Xalqaro qishloq xo‘jaligi universiteti qishloq xo‘jaligi sohasidagi yetakchi ta’lim muassasasi bo‘lib, u keng ko‘lamli bakalavriat ta’lim yo‘nalishlarini, shu o‘quv yilidan boshlab esa magistratura bosqichida tehsil olishni ham taklif etadi. Bu yerda qishloq xo‘jaligi sanoati uchun zamonaviy talab va standartlarga muvofiq yuqori malakali kadrlar tayyorlash, shuningdek, bu borada yetakchi xorijiy oliy o‘quv yurtlari bilan uzoq muddatli aloqalarni rivojlantirishga ustuvorlik beriladi.

Dastur va o‘quv jarayoniga qo‘yiladigan talablar xorijiy hamkor universitet – Qirollik qishloq xo‘jaligi universiteti (RAU) tomonidan belgilanadi. Bu qariyb 150 yillik tarixga ega Buyuk Britaniyadagi eng nufuzli universitetlardan biri hisoblanadi. Toshkentdagi Xalqaro qishloq xo‘jaligi universiteti bitiruvchilari o‘qishni tamomlagandan so‘ng Britaniya universiteti diplomiga ega bo‘ladilar. IAUning asosiy afzalliklaridan biri professor-o‘qituvchilar tarkibini ko‘rib chiqish mumkin. Bu yerda AQSH, Hindiston, Avstraliya, Polsha, Buyuk Britaniya, Niderlandiya, Kanada va boshqa mamlakatlardan professor, dotsent va o‘qituvchilar ta’lim berib o‘z tajribalari bilan o‘rtoqlashmoqda.

Taqdimotda Xalqaro qishloq xo‘jaligi universitetining operatsiyalar bo‘yicha prorektori, doktor Slavomir Vroblevskiy “Universitetimizda ilm-fanning eng so‘nggi yutuqlari asosida turli yo‘nalishlar bo‘yicha mutaxassislarga bilim berib kelinmoqda. O‘ylaymizki, universitetimiz talabalari olgan bilimlarini o‘z faoliyatida qo‘llay oladi va zamonamizning global muammolarini hal etishga hissa qo‘shadi”,– deya  ta’kidladi:

Universitetdagi barcha ma’ruzalar ingliz tilida olib boriladi, shuning uchun universitetga kirish uchun asosiy talablardan biri ingliz tilini yetarli darajada bilish, ya’ni IELTS imtihonidan kamida 5 ball to‘plashdir. Universitetda agronomiya, agroiqtisodiyot, agrologiya, biotexnologiya, aqlli qishloq xo‘jaligi, chorvachilik va oziq-ovqat xavfsizligi bo‘yicha o‘quv dasturlari mavjud. Universitet talabalarga zamonaviy kasblar bo‘yicha xalqaro darajaga ega bo‘lish imkoniyatini beradi. Ular orasida: oziq-ovqat xavfsizligi bo‘yicha menejer, eksport va import mutaxassisi, qishloq xo‘jaligida kompyuter texnologiyalari muhandisi va boshqalar.

Universitetdagi o‘quv jarayoni va sharoitlar shunday yaratilganki, talabalar olgan bilimlarini amaliyotda darhol qo‘llay oladi. Buning uchun bo‘lajak ish beruvchilar universitet bilan hamkorlik qilishga taklif etiladi, ular orasida klasterlar, savdo kompaniyalari va hududiy markazlar mavjud.

Bo‘lajak talabalarni Toshkentdagi Xalqaro qishloq xo‘jaligi universiteti kutmoqda. O‘qishga kirish uchun arizalar 2023-yil iyun oyi oxirigacha qabul qilinadi.