UZFOOD-2023: TURFA MAHSULOTLAR VA YANGI IMKONIYATLAR

Qishloq xo‘jaligida oziq-ovqat mahsulotlarini yetishtirish, ularni qayta ishlash hamda sifatli va xavfsiz ko‘rinishda xaridorga yetkazib berish eng muhim omil hisoblanadi. Poytaxtimizdagi “O‘zekspomarkaz” majmuasida bo‘lib o‘tayotgan “UzFood-2023” xalqaro ko‘rgazmasi aynan ushbu maqsadda tashkil etildi. Tadbirning ochilish marosimiga xorijiy davlatlarning O‘zbekistondagi vakolatxonasi vakillari, ekspertlar va xalqaro kompaniyalarning rahbar va mutaxassislari tashrif buyurishdi.

O‘zbekiston Respublikasi Qishloq xo‘jaligi vazirligi, O‘zbekiston Respublikasi Investitsiyalar, sanoat va savdo vazirligi, “O‘zbek oziq-ovqat zahira” uyushmasi, O‘zbekiston Savdo-sanoat palatasi ko‘magida bo‘lib o‘tayotgan ko‘rgazmani Qishloq xo‘jaligi vaziri o‘rinbosari Umid Mamadaminov kirish so‘zi bilan ochib berdi:

— Bugungi kunda, qishloq xo‘jaligi va oziq-ovqat sohasini rivojlantirishga davlatimiz tomonidan katta eʼtibor berilmoqda. Jumladan, qishloq xo‘jaligi sohasini rivojlantirishning 2020-2030-yillarga mo‘ljallangan Strategiyasi doirasida tub islohotlar amalga oshirilib, bir qator ijobiy natijalarga erishildi. Masalan, “Global oziq-ovqat xavfsizligi” indeksida O‘zbekistonning o‘rni 113 ta mamlakat orasidan 12 pog‘ona yuqoriga ko‘tarildi. O‘zbekiston 2019-2022-yillarda oziq-ovqat xavfsizligi bo‘yicha eng yuqori o‘sish ko‘rsatkichlariga erishgan 10 ta mamlakat ichida birinchi o‘rinni egalladi. Sohada olib borilgan tizimli islohotlar natijasida, 22 million tonnadan ortiq meva–sabzavotlar, 8,2 million tonnaga yaqin donli ekinlar hamda 3,5 million tonnadan ziyod paxta homashyosi yetishtirildi. Hozirda sohani raqamlashtirishga ham katta eʼtibor berilib, bir qancha loyihalar amalga oshirilmoqda.

Shundan so‘ng rasmiylar ishtirokida ramziy qizil lenta kesilib, ko‘rgazma pavilyonlari ko‘zdan kechirildi.

28-30-mart kunlari, ya’ni 3 kun davom etgan ushbu ko‘rgazmada Xitoy, Rossiya, Turkiya, Belarus, Hindiston kabi 26 mamlakatning 280 dan ortiq kompaniyalari ishtirok etmoqda.

Mana yigirma yildan oshdiki, an’anaviy tarzda o‘tkazib kelinayotgan “UzFood-2023” xalqaro ko‘rgazmasi oziq-ovqat sanoatining muhim va yetakchi tadbirlaridan bo‘lib, bu yil unda o‘tgan yildagidan 1,5 baravar ko‘proq mehmonlar va ishtirokchilar qatnashmoqda. Ushbu ko‘rgazma O‘zbekiston hukumati tomonidan sohani rivojlantirish, mahalliy ishlab chiqaruvchilarni qo‘llab-quvvatlash va rag‘batlantirish bo‘yicha qabul qilingan dasturiy chora-tadbirlarni amalga oshirish bo‘yicha samarali platforma vazifasini bajarib kelmoqda. Shuningdek, u aholini oziq-ovqat bilan taʼminlash, zamonaviy texnologiyalardan foydalangan holda ishlab chiqarishni rivojlantirish va eksport taʼminotini yo‘lga qo‘yish uchun mahalliy biznesga yordam vazifasini ham o‘tamoqda.

Bu yil ko‘rgazma “O‘zekspomarkaz” majmuasining 3 ta pavilyoni va Atrium zalini to‘liq band etdi. Bu esa, mamlakatimiz va xorijiy tadbirkorlarning ko‘rgazmaga qiziqishi ortayotganidan va unga ishonch bildirayotganidan dalolatdir.

Ko‘rgazmaga tashrif buyurgan korxona va tashkilotlar, tadbirkorlar bu yerda qishloq xo‘jaligida mahsulot yetishtirish va ishlab chiqarish borasida ko‘plab yangiliklarga ega bo‘lish, o‘zaro tajriba almashish va xalqaro shartnomalarni imzolash imkoniyatlariga ega bo‘lishmoqda.

Endi esa, ko‘rgazmaning pavilyonlariga va undagi mahsulotlarning xilma–xilligiga nazar tashlaymiz:

1-pavilyonda: go‘shtni qayta ishlash, sut sanoati, yog‘-moy ishlab chiqarish, qandolat sanoati, non yopish va sovutish uchun keng ko‘lamli uskunalar;

2-pavilyonda: «Qadoqlash. Uskunalar va materiallar – O‘ZuPACK» bo‘limi o‘z ekspozitsiyasini joylashtirgan va qadoqlash sanoati uchun zarur bo‘lgan barcha mahsulotlarni taqdim etmoqda: poligrafiya va qadoqlash uskunalari, quyish va probkalash, qopqoqlar, yumshoq, qog‘oz va vakuumli qadoqlash, bosib chiqarish, markalash va yorliqlar.

3-pavilyondan esa go‘sht va go‘sht mahsulotlari, sut, un, qandolat mahsulotlari o‘rin olgan.

Shuningdek, ko‘rgazma doirasida hamkorlikni yanada kengaytirish maqsadida ishtirokchi davlatlar vakillari bilan biznes forumlar o‘tkazilmoqda. Jumladan, ko‘rgazmaning birinchi kunida O‘zbekiston va Belorus davlatlarining qishloq xo‘jaligi vazirlari hamda tadbirkorlari ishtirokidagi forum ikki davlat vakillari uchun ham ko‘plab yangi imkoniyatlar eshiklarini ochdi.

Yildan yilga ko‘rgazmaning namoyish maydoni kengaymoqda, ishtirokchilar soni ortmoqda. Bu esa, investitsiya kiritish uchun xavfsiz va imkoniyatlari yuqori bo‘lgan — O‘zbekiston uchun qishloq xo‘jaligi sohasining rivojlanayotganidan, savdo imkoniyatlarning tobora ortayotganidan darak beradi.