MAQSAD — YERDAN SAMARALI FOYDALANISH VA HOSILDORLIKNI OSHIRISH

O‘zbekiston Respublikasi Qishloq xo‘jaligi vazirligi huzuridagi Sabzavot, poliz ekinlari va kartoshkachilik ilmiy-tadqiqot institutining Qashqadaryo ilmiy-tajriba stansiyasida “Janubiy mintaqalarda ertagi sabzavot, poliz va kartoshka yetishtirish, dala chetlaridan samarali foydalanish” mavzusida dala seminari bo‘lib o‘tdi.

Ushbu amaliy seminarda Kitob tumani qishloq xo‘jaligi boshqarmasi, Kadastr agentligi va Agrosanoat majmui ustidan nazorat qilish inspeksiyasining tuman bo‘limlari xodimlari, hududning dehqon va fermer xo‘jaliklar rahbarlari, tomorqa yer egalari, sabzavotchilik yo‘nalishi bo‘yicha klasterlar vakillari, mahalla fuqarolar yig‘ini faollari ishtirok etishdi.

Tadbirni tashkil etishdan ko‘zlangan maqsad yagona, u ham bo‘lsa dala chetlaridagi foydalanilmayotgan yerlarni o‘zlashtirish, aholiga sabzavot-poliz, kartoshka ekinlarini yetishtirishda yerdan unumli va samarali foydalanish, hosildorlikni oshirishga ko‘maklashish bo‘yicha maʼlumot va tavsiyalar berishdan iborat.

Seminar ishtirokchilariga Qashqadaryo ilmiy tajriba stansiyasi ilmiy xodimlari tomonidan sabzavot, poliz va kartoshkachilik sohasidagi eng so‘nggi ilmiy va amaliy yutuqlar, intensiv, resurs tejamkor agrotexnologiyalar, sabzavotlarning mahalliy yangi istiqbolli nav va durаgaylari, viloyat va tuman kesimida ekinlarni ekish muddatlari va usullari, har bir ekin uchun agrotexnologiyalarni to‘g‘ri amalga oshirish, dala chetlaridan samarali foydalanish bo‘yicha muhim maʼlumotlar, tavsiyalar berildi.

Shuningdek, seminarda ishtirokchilar ilmiy tajriba stansiyasida yaratilgan yangi navlar bilan tanishishdi. Xususan, issiqxonada qopqoq usulida rediska yetishtirishning o‘ziga xosligi ularning e’tiborini tortdi. Dalalardagi amaliyotlardan esa, yer egalari o‘z tajribalariga asqatadigan foydali ma’lumot va maslahatlar olishdi.

Ushbu dala seminari va unda ishtirok etgan rahbar va agrar soha vakillarining fikr-mulohazalari bilan videolavhamizda tanishing.