AGRAR SOHA XODIMLARI REFERENDUMDA FAOL ISHTIROK ETADI

Ma’lumki, joriy yilning 30-aprel kuni O‘zbekiston Respublikasi Oliy Majlis Qonunchilik palatasining 2023-yil 10-martdagi hamda Oliy Majlis Senatining 14-martdagi qarorlariga muvofiq, “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy Qonuni loyihasi bo‘yicha O‘zbekiston Respublikasining referendumi o‘tkaziladi.

Mazkur ijtimoiy-siyosiy muhim voqelik munosabati bilan kuni kecha Toshkent Davlat Agrar universitetida “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasining mazmun va mohiyatini tushuntirishga bag‘ishlangan  targ‘ibot-tashviqot tadbiri o‘tkazildi. Unda Qishloq xo‘jaligi vazirligi tizimidagi barcha idora va tashkilotlar mas’ullari, universitetning  professor o‘qituvchilari va hududiy boshqarmalarning ishchi xodimlari ZOOM  platformasi orqali ishtirok etdi. Tadbirda Oliy Majlis Qonunchilik palatasi deputati A’zamjon To‘laboevning ma’ruzasi tinglandi. Ma’ruzada Konstitutsiyaviy islohotlar bilan bog‘liq muhim siyosiy-huquqiy jarayonlar xususida ma’lumot berib o‘tildi.

Nargiza Umurzoqova Toshkent Davlat Agrar universiteti Gumanitar fanlar kafedrasi katta o‘qituvchisi:

– Oliy Majlis Qonunchilik palatasi deputatlari ishtirokida davra suhbati bo‘lib o‘tdi. Bu davra suhbati ishtirokchilari Konstitutsiyamizga  nima uchun o‘zgartirish kiritilayotgani, Yangi O‘zbekistonda yangi o‘zgarishlar, yaxshi islohotlar amalga oshirilayotgani haqida xabardor bo‘lishdi. Jumladan,  Konstitutsiyadagi 128-moddaga yana 27 ta modda qo‘shilib, 155 ta modda holatiga keltirilayotgani va bu moddalarda kiritilayotgan o‘zgarishlar hammasi inson va jamiyat, davlat hayotidagi muhim masalalarni va muhim ijtimoiy huquqiy masalalarni tartibga solish bilan ajralib turishi borasida gapirib o‘tdilar. Biz ham Toshkent Davlat Agrar universiteti xodimlari joriy yilning 30-aprel kuni O‘zbekiston Respublikasi Konstitutsiyaviy Qonuni loyihasi bo‘yicha O‘zbekiston Respublikasining referendumida faol ishtirok etamiz.  

Tadbirda, shuningdek, Konstitutsiyada yoshlar va ta’limni, gender tenglikni, tadbirkorlik faoliyatini qo‘llab-quvvatlash, erkin axborot olish, ijtimoiy himoya va ekologik huquqlarni, sud tizimlari erkinligi va mustaqilligini ta’minlash, Parlament vakolatlarini yanada kuchaytirish borasidagi yangi o‘zgarishlar alohida qayd etildi.

Nursulton Ne’matov Toshkent davlat agrar universitetining O‘rmon xo‘jaligi va landshaft dizayni fakulteti 1 bosqich talabasi:

– Joriy yilning 30-aprel sanasida  Konstitutsiyamizga kiritilgan o‘zgartishlar munosabati bilan O‘zbekiston Respublikasida referendum o‘tkazilishi qaror qilingan. Shu munosabat bilan Toshkent Davlat Agrar universitetining barcha yosh talabalari referendumga o‘z faolligi bilan qatnashadi.Va yangi Konstitutsiyamiz qabul qilingandan so‘ng, bu Konstitutsiya orqali yetuk marralarga erishishimizga ishonamiz.

Darhaqiqat, xalqimizning, ekspert va mutaxassislarning takliflari, xalqaro va xorijiy davlatlarning tajribasi inobatga olingan holda tayyorlangan Konstitutsiyaviy qonun loyihasi  xalqimizning farovon hayoti uchun mustahkam huquqiy asos bo‘lib xizmat qiladi.