AGRAR SOHADAGI ISHLAR TAHLIL QILINDI VA GALDAGI VAZIFALAR  BELGILAB OLINDI

Bugun Qishloq xo‘jaligi vazirligida O‘zbekiston Respublikasi  Prezidenti Administratsiyasi vakillari, vazirlik va idoralar mas’ullari hamda Qishloq xo‘jaligi vazirligi tizimidagi tashkilot va boshqarmalar mas’ullari ishtirokida yig‘ilish bo‘lib o‘tdi. 

Unda yurtimizda  agrar sohada shu kungacha  olib borilayotgan ishlar, sohadagi mavjud muammolarni bartaraf etish yo‘llari atroflicha muhokama qilindi. Shuningdek,  yig‘ilishda qishloq xo‘jaligidagi vazifalar ijrosini ta’minlashga davlatimiz rahbari tomonidan berilgan topshiriqlarni so‘zsiz  ijro etish bo‘yicha yaxlit tizim yaratish nuqtai-nazaridan yondashildi.

Jumladan,  bugungi kunda paxtani yetishtirish va uni qayta ishlash bo‘yicha ish samaradorligini ta’minlash, bu jarayonda ishtirok etuvchi mutasaddilarning mas’uliyatini oshirish, shuningdek, kartoshka yetishtirish  va urug‘chiligini yo‘lga qo‘yish,  bu borada yurtimizning turli hududlaridagi tuproqlar va iqlim sharoitlarini hisobga olish lozimligi ta’kidlandi. Xususan, mamlakatimizning tuproq-iqlim sharoiti kartoshka yetishtirish uchun qulay bo‘lsa-da, hanuzgacha mamlakatimiz aholisining iste’moli uchun  mo‘ljallangan kartoshka hajmining ma’lum bir qismi xorijiy mamlakatlardan  import qilinayotgani  aytib o‘tildi.  Buning yechimi sifatida Urug‘chilikni rivojlantirish markazi  qoshida 7 ta viloyat: Andijon, Jizzax, Qashqadaryo Namangan, Samarqand Toshkent va Farg‘ona viloyatlarining 18 ta hududida  900 gektarga yaqin  maydonda  kartoshka yetishtirish bilan shug‘ullanuvchi elita urug‘chilik  xo‘jaliklarini tashkil etish lozimligi belgilandi.

Shuningdek yig‘ilishda xalqaro moliya institutlarining  mablag‘lari va  sarmoyadorlarni jalb qilgan holda  viloyatlarda   bog‘dorchilikni rivojlantirish, meva-sabzavot yetishtirish, qishloq xo‘jaligi mahsulotlarini  qayta ishlash va  shok usulida  muzlatish,  quritish va qadoqlash  majmualari va agrologistika  markazlari faoliyatini yo‘lga qo‘yish ustuvor vazifa sifatida tanlab olindi.