QISHLOQ XO‘JALIGI VAZIRINING AQShning O‘ZBEKISTONDAGI ELCHISI BILAN UCHRASHUVI

O‘zbekiston Respublikasi Qishloq xo‘jaligi vazirligida vazir Aziz Voitov AQShning O‘zbekistondagi Favqulodda va Muxtor elchisi J. Xenik bilan uchrashdi.

Uchrashuvda qishloq xo‘jaligi sohasida ikki tomonlama hamkorlikning hozirgi holati muhokama qilindi hamda istiqbolli yo‘nalishlar belgilab olindi.

Muzokaralar mobaynida ikki tomonlama manfaatli bo‘lgan bir qator kelishuvlarga erishildi. Jumladan:

• Hozirda O‘zbekistondan AQShga qovun eksporti uchun fitosanitar ruxsatnomani olish jarayoni boshlangani va mazkur jarayonni tezlashtirish bo‘yicha elchi tomonidan amaliy yordam ko‘rsatilishi taʼkidlandi;
• AQShning oziq-ovqat xavfsizligini taʼminlash va qishloq xo‘jaligi mahsulotlari uchun xalqaro fitosanitariya sertifikatsiya tizimini o‘rganish maqsadida, o‘zbekistonlik mutaxassislarni joriy yilning 2-yarmidan AQShga o‘quv safariga jo‘natishga kelishib olindi;

• O‘zbekiston va AQSh o‘rtasida agrar taʼlim sohasida faol hamkorlik yo‘lga qo‘yilishi alohida taʼkidlanib, Toshkent davlat agrar universiteti va Missisipi universiteti o‘rtasida qo‘shma magistratura dasturini joriy etilishi eʼtirof etildi hamda uning davomli bo‘lishi qo‘llab-quvvatlandi;
• Joriy yilning mart oyida mamlakatimizga Texas qishloq xo‘jaligi komissari S. Miller boshchiligidagi delegatsiyaning tashrifi rejalashtirilgan. S.Millerning 28-30 mart kunlari respublikamizda o‘tkaziladigan xalqaro ko‘rgazmada ishtirok etishini taʼminlash bo‘yicha kelishuvga erishildi;
• Mamlakatimizda qishloq aholisining turmush darajasini yaxshilash, sohani raqamlashtirish bo‘yicha amerikalik mutaxassislarni jalb qilish  masalasi ham muzokaralarda o‘z yechimini topdi;
• “USAID” tashkilotining “Agrobiznes” dasturi doirasida
  bog‘dorchilik, sut mahsulotlarini ishlab chiqarish va boshqa yo‘nalishlarda hamkorlikni jadallashtirish bo‘yicha ham samarali kelishuvga erishildi.

Manfaatli kelishuvlarga boy bo‘lgan uchrashuv yakunida fevral oyida O‘zbekiston va AQSh davlatining qishloq xo‘jaligi vazirlarining o‘zaro muzokaralarini onlayn-shaklda o‘tkazishga kelishib olindi.