GLOBAL G.A.P. VA GIZ O‘ZBEKISTONNING BOSHLANG‘ICH YIG‘ILISHI O‘TKAZILDI

24-noyabr kuni Toshkentda GLOBAL G.A.P. va GIZ O‘zbekistonning boshlang‘ich yig‘ilishi panel muhokamalar formatida bo‘lib o‘tdi. Tadbirda O‘zbekiston Respublikasi Qishloq xo‘jaligi vazirligi rahbar xodimlari, agrar sohada faoliyat yurituvchi milliy va xalqaro tashkilotlar vakillari, GLOBAL G.A.P. va GIZ O‘zbekiston sertifikatlashtirish sohasi xodimlari va mutaxassislari, shuningdek, IAU (Xalqaro qishloq xo‘jaligi universiteti) va TDAU (Toshkent davlat agrar universiteti) vakillari ishtirok etdi.

Uchrashuvdan ko‘zlangan maqsad GIZ O‘zbekiston va GLOBAL G.A.P. o‘rtasidagi hamkorlikning boshlanishi haqida ma’lumot berish hamda O‘zbekistonda xalqaro sertifikatlashtirish sohasida salohiyatni oshirishdan iborat.

Ushbu xalqaro standart oziq-ovqat xavfsizligi, ishchilar salomatligi va xavfsizligi, hayvonlar farovonligi va atrof-muhit muhofazasi uchun kafolat bo‘lib xizmat qiladi.

«Barcha xalqaro e’tirof etilgan standartlar qishloq xo‘jaligi va qayta ishlangan oziq-ovqat mahsulotlari xavfsiz bo‘lishi hamda ularning sifati ta’minlanishi uchun o‘rnatiladi. Shu bois, ushbu standartlar talablarini joriy etishda biz iste’molchilarning o‘zlari ushbu mahsulotlar xavfsiz, sertifikatlangan, raqobatbardosh va barcha xalqaro standartlar talablariga javob berishini bilib olishlarini ta’minlab beradigan tizim yaratamiz”, — dedi Organik ishlab chiqarish va maqbul qishloq xo‘jaligi amaliyotini rivojlantirish boshqarmasi boshlig‘i Anvar Djumanov

Ushbu standart bo‘yicha sertifikat olish yetishtirilgan mahsulotlarning barcha sifat talablariga muvofiqligini tasdiqlaydi, bu esa mijozlarning sodiqligini oshirishga hamda sotish hajmini o‘stirishga yordam berishi shubhasiz.

“Bizning asosiy maqsadimiz fermer nima qila olishini bilishi va duch kelishi mumkin bo‘lgan barcha xavf-xatarlarni mustaqil baholashi mumkin bo‘lgan tizimni joriy etishdan iborat. Fermer xo‘jaligi uning rahbari uchun iqtisodiy jihatdan foydali, samarali, shuningdek, iste’molchilar uchun xavfsiz bo‘lishi kerak”, – dedi GLOBAL G.A.P.ning Markaziy Osiyo va Latviya bo‘yicha asosiy texnik mijozar bilan ishlash bo‘yicha menejer Edit Strazdina o‘z nutqida.

GIZ loyihasi mahalliy sertifikatlangan maslahatchilar sonini, ayniqsa meva-sabzavot mahsulotlarini ishlab chiqarish borasida ko‘paytirishga hamda targ‘ibot kampaniyalari va axborot tadbirlari orqali standartlarni targ‘ib qilishga qaratilgan.

“Biz o‘z loyihamiz doirasida qishloq xo‘jaligini iqtisodiy rivojlantirishning muhim tarkibiy qismini amalga oshirmoqdamiz. Qishloq xo‘jaligi bu loyihaning katta qismidir. O‘zbekistonda qishloq xo‘jaligini yanada rivojlantirishga yo‘naltiriladigan loyihalarga qo‘shimcha mablag‘lar ajratildi”, — dedi GIZning “O‘zbekiston hududlarida iqtisodiy islohotlar va barqaror iqtisodiy rivojlanishni qo‘llab-quvvatlash” dasturi rahbari Beate Shorayt.

Kelgusida xalqaro standartlarning joriy etilishi agrar tarmoqning iqtisodiy salohiyatini kafolatlaydi. Chunki xavfsiz mahsulotlar bilan ta’minlash O‘zbekistonda qabul qilingan Qishloq xo‘jaligini rivojlantirish strategiyasini amalga oshirish bilan bevosita bog‘liq.

“Xalqaro standartlar nafaqat fermerlarning o‘zlari va eksport qiluvchi korxonalar, balki butun mamlakat aholisi uchun ham foydalidir, chunki bu O‘zbekistonda atrof-muhitni muhofaza qilish va qishloq xo‘jaligi ishlab chiqarishining barqarorligini ta’minlash masalalariga ham o‘z ta’sirini o‘tkazadi”, — dedi o‘z nutqida GLOBAL G.A.P. dasturiy menejeri Yan Lyusi.