KARTOSHKA URUG‘CHILIGI BO‘YICHA KOREYA BILAN ILMIY-TADQIQOT ISHLARIDA HAMKORLIK QILINADI

2022-yil 28-sentyabr kuni Qishloq xo‘jaligida bilim va innovatsiyalar Milliy markazida Janubiy Koreyaning “Withroad Co., Ltd.” kompaniyasi, Sabzavot, poliz ekinlari va kartoshkachilik ilmiy-tadqiqot instituti hamda Milliy markaz vakillari o‘rtasida hamkorlik uchrashuvi bo‘lib o‘tdi.

Uchrashuvda Koreya tomonidan kompaniya bosh direktori Hong Seojin, O‘zbekiston tomonidan esa Sabzavot, poliz ekinlari va kartoshkachilik ITI direktori Rustam Nizomov hamda Milliy markaz halqaro bo‘lim boshlig‘i Sanjar Adilov ishtirok etdi.

Mehmonlarga dastlab Sabzavot, poliz ekinlari va kartoshkachilik ilmiy-tadqiqot instituti ilmiy faoliyati bo‘yicha maʼlumot berildi, ikki tashkilot faoliyati bo‘yicha suhbatlashildi, shuningdek, kartoshkachilik sohasi bo‘yicha hamkorlik istiqbollari muhokama etildi.

Tadbir so‘ngida tomonlar o‘rtasida O‘zbekistonda zamonaviy in vitro usulida kartoshka urug‘liklarining sog‘lom mini tuganaklarini ko‘paytirish, issiqxona sharoitida mikro tuganaklarini yetishtirish va ommaviy ishlab chiqarish usullari hamda yetishtirish texnologiyalari bo‘yicha ilmiy-tadqiqot, tajriba-konstruktorlik ishlarini hamkorlikda olib borish maqsadida o‘zaro anglashuv memorandumi imzolandi va kelajakda bajariladigan hamkorlik ishlari kelishib olindi.