2022-yilning 9-15-avgust kunlari Prezident Administratsiyasi xodimlari, Xalqaro qishloq xo‘jaligi universiteti rektori vazifasini vaqtincha bajaruvchi Munira Aminova, O‘zbekiston Respublikasi Qishloq xo‘jaligi vazirligi huzuridagi Qishloq xo‘jaligini mexanizatsiyalash ilmiy-tadqiqot instituti direktori Shuhrat Azizov va boshqa tashkilotlar vakillari tashrif bilan Ispaniyada bo‘lib turibdi.
Tashrifdan ko‘zlangan maqsad mamlakatlar o‘rtasida qishloq xo‘jaligi sohasida yetakchi oliy ta’lim va ilmiy-tadqiqot muassasalari bilan uzoq muddatli shartnomalar tuzishdan iborat.
Tashrif doirasida «Ingeser» kompaniyasining tijorat bo‘yicha direktori Nikolay Chubinov bilan uchrashuv bo‘lib o‘tdi. Kompaniya O‘zbekistonda meva-sabzavot mahsulotlarini saqlash, saralash, qayta ishlash, quritish, shok muzlatish va eksport qilish bo‘yicha Agromarkaz yaratish loyihasi ustida ishlamoqda. Uchrashuvda injiniring, konsalting, O‘zbekistondagi Xalqaro qishloq xo‘jaligi universiteti uchun bo‘lajak markaz va Agro inkubatorning salohiyatini oshirish masalalari muhokama qilindi.
Shuningdek, O‘zbekistonning Ispaniyadagi elchixonasida delegatsiyaning “SpainMed” kompaniyasi bosh direktori janob Xose Alvares bilan uchrashuv bo‘lib o‘tdi. Unda genetik modifikatsiyalangan qo‘y naslchiligi loyihasi muhokama qilindi va ikki davlat mutaxassislari o‘rtasida ushbu yo‘nalishdagi hamkorlik qilish istiqbollari ko‘rib chiqildi.
Bundan tashqari, delegatsiya a’zolari mamlakatda tomchilatib sug‘orish usulini joriy etishga ixtisoslashgan «Fenacore» kompaniyasi yetakchi muhandisi bilan uchrashdi. Kompaniya mutaxassislarini O‘zbekistonda mahorat darslarini o‘tkazish uchun taklif qilish masalasi o‘rtaga tashlandi.
Toledo shahridagi Kastilya-la-Mancha avtonom okrugida Ta’lim, yoshlar va sport bo‘yicha kengash bosh direktori Karlos Alberto hamda universitet vakillari bilan uchrashuvlar o‘tkazilishi rejalashtirilgan. Shuningdek, bir qator boshqa uchrashuvlar ham ko‘zda tutilgan.
Imlo xatolari haqida hisobot
Quyidagi matn tahririyatimizga yuboriladi: