QORAQALPOG‘ISTON QISHLOQ XO‘JALIGI VA AGROTEXNOLOGIYALAR INSTITUTI

Qoraqalpog‘iston qishloq xo‘jaligi va agrotexnologiyalar instituti “Qoraqalpog‘iston qishloq xo‘jaligi va agrotexnologiyalar institutini tashkil etish chora-tadbirlari to‘g‘risida” Hukumat qaroriga (275-son, 04.05.2021-y.) muvofiq, 2021/2022-o‘quv yilidan Toshkent davlat agrar universitetining Nukus filiali negizida tashkil etildi. Bugungi kunda institutda 28 ta bakalavr taʼlim yo‘nalishi va 23 ta magistratura mutaxassisliklari bo‘yicha 2500 dan ortiq  talaba tahsil olmoqda.

Ushbu talabalarga 10 dan ortiq fan doktori va professorlar, 70 ga yaqin fan nomzodi, dotsentlar, 10 dan ortiq katta o‘qituvchilar dars bermoqda. Institut bo‘yicha ilmiy salohiyat 44 foizni tashkil qiladi.

Institut Axborot-resurs markazining umumiy kitoblar fondi 45 mingdan ortiq, ularning 23 mingga yaqini darslik va o‘quv qo‘llanmalar, 8 mingga yaqini ilmiy adabiyotlar, 3 mingga yaqini badiiy adabiyotlar, 1 mingdan ortig‘i elektron darsliklardan iborat. Axborot-resurs markazida 1217 dan ortiq elektron resurslar mavjud. 12 ta o‘quv laboratoriyalarda talabalar ilmiy izlanishlar olib borishadi.

Qoraqalpog‘iston qishloq xo‘jaligi va agrotexnologiyalar instituti Yevropa, Yaponiya, Mustaqil davlatlar hamdo‘stligi davlatlarining rivojlangan oliy taʼlim muassasalari va o‘quv markazlari bilan hamkorlik aloqalarini olib bormoqda. Hozirgi kunda chet el OTM va tashkilotlari bilan 23 ta shartnoma va memorandumlar imzolangan.

Jumladan, Yaponiyaning Chibo universiteti va OYO korporatsiyasi, Tokio qishloq xo‘jaligi va texnologiyalar universiteti, Italiyaning Piza universiteti, Rossiyaning Orenburg davlat agrar universiteti,  Belgorod davlat agrar universiteti, Qozog‘iston milliy agrar universiteti, Ozarbayjon davlat agrar universiteti, Qirg‘iziston xalqaro universiteti bilan hamkorlik shartnomalari mavjud. Shuningdek, O‘zbekiston-Olmoniya texnik markazi mutaxassislari  va olimlari bilan hamkorlik  yo‘lga qo‘yilgan.

Yevropa Ittifoqining ERASMUS+, taʼlim sohasida xalqaro hamkorlikni rivojlantirish dasturining “O‘zbekistonda veterinariya sohasini tizimli o‘qitish” loyihasi bo‘yicha xalqaro hamkorlik ishlari olib borildi va 2019-yilda ushbu loyiha doirasida 39 ming yevro miqdorida investitsiya kiritildi.

Yaponiyaning OYO korporatsiyasi bilan hamkorlikdagi “Qoraqalpog‘iston Respublikasida cho‘llanishga qarshi kurashda o‘rmonzorlarni barpo etishga ko‘maklashish” loyihasi doirasida 13750 dollarlik qiymatdagi meteorologik stansiya olib kelindi.

Birlashgan millatlar tashkilotining Oziq-ovqat va qishloq xo‘jaligi tashkiloti (FAO) bilan imzolangan memorandum asosida institutga 7000 dollarlik yangi rusumdagi kimyoviy moddalar purkagichlari keltirildi. Shuningdek, 19 000 dollarlik tuproqni haydamay ekadigan seyalka xarid qilindi.

Germaniyaning GIZ tashkilotining “O‘zbekistonning tanlangan hududlarida barqaror iqtisodiy rivojlanish” loyihasi doirasida institutning Baliqchilik kafedrasi huzurida akvamadaniyatni rivojlantirish maqsadida 2 ta laboratoriya tashkil qilindi. Laboratoriyaga kiritilgan umumiy sarmoya muqdori 401 774 000 so‘mni tashkil etadi.