SUVNI TEJASHDA KO‘MAKCHI LAZERLI YER TEKISLAGICHLAR

So‘nggi ikki yilda qishloq xo‘jaligi ekinlarini yetishtirishda suvni tejaydigan texnologiyalarni joriy etishga alohida eʼtibor qaratilmoqda. Suvdan foydalanish samaradorligi hamda hosildorlikni oshirish maqsadida oxirgi uch yilda 852 dona, jumladan, 2022-yilning birinchi yarim yilligida respublika bo‘yicha 87 dona lazerli yer tekislagichlar xarid qilindi.

Tuproqni lazer bilan tekislash – bu maxsus lazerli tekislash moslamasi yordamida yerni 1-3 sm dan ortiq bo‘lmagan farq darajasida tekislashdir.

Lazerli tekislashning afzalliklari:

• sug‘orish suvi sarfi 20-25 % ga tejaladi;
• suvdan foydalanish samaradorligi 30 – 40% ga ortadi;
• sug‘orishga ketadigan vaqt, ishchi kuchi va energiya tejaladi;
• dala maydonida ekinlar bir tekis unuvchanlikka ega bo‘ladi;
• ekinlar bir xil ozuqa moddalar va namlik bilan taʼminlanadi;
• begona o‘tlar miqdori kamayadi;
• qishloq xo‘jaligida 1 gektar maydonda qo‘shimcha 5-7 s hosil olishga erishiladi;
• eng asosiysi, yerga ishlov berish to‘g‘ri olib borilsa, dala maydoni 4 yilda qayta tekislanadi.

Bugungi kunda qishloq xo‘jaligida yuqori unumli, resurstejamkor, kombinatsiyalashgan va maxsus texnikalarga zarur eʼtibor qaratilib, texnika sotib oluvchilarni davlat tomonidan moliyaviy qo‘llab-quvvatlash choralari ko‘rib borilmoqda.

Jumladan, mahalliy ishlab chiqaruvchilar tomonidan ishlab chiqarilgan lazerli qurilmaga ega avtomatlashtirilgan yer tekislagich agregatlarini sotib olgan qishloq xo‘jaligi ishlab chiqaruvchilariga sotib olingan yer tekislagich agregatlari qiymatining 30 foizi davlat byudjetidan qoplab beriladi.