O‘zbekiston-Braziliya: urug‘chilik, o‘g‘it, suvni tejovchi texnologiyalar bo‘yicha hamkorlik muhokamasi

O‘zbekiston Respublikasi Qishloq xo‘jaligi vazirligida vazir maslahatchisi Alisher Shukurovning Braziliya Federativ Respublikasining O‘zbekistondagi elchisi Rodrigo De Lima Baena Soares (qarorgohi Moskva shahrida) bilan uchrashuvi bo‘lib o‘tdi.

Tadbir avvalida respublikadagi agrar sohada amalga oshirilayotgan islohotlarga to‘xtalinib, tabiiy resurslarning boshqaruv tizimini shakllantirish hamda ikki davlat uchun manfaatli bo‘lgan eksport salohiyatini rivojlantirish bo‘yicha fikr-mulohazalar bildirildi.

Mehmon Rodrigo De Lima Baena Soares hamkorlikdagi qishloq xo‘jaligi mahsulotlari tovar aylanmasida ularning xilma xilligini taʼminlashdan manfaatdor ekanligini taʼkidladi. Xususan, respublikamizga Braziliyadan mol va tovuq go‘shti eksportini yo‘lga qo‘yish va shakar eksportini ko‘paytirish bo‘yicha takliflarini aytdi.

Alisher Shukurovning bildirishicha, bugungi kunda respublikamizda urug‘chilik, o‘g‘it hamda suvni tejovchi texnologiyalarning import ko‘lami yuqori. Shu bois, braziliyalik biznes vakillari ushbu sohalarga investitsiya kiritishi samarali ekanligi taʼkidlandi.

Uchrashuv davomida Braziliya qishloq xo‘jaligi tadqiqot korporatsiyasi (Embrapa) va O‘zbekiston Respublikasi Qishloq xo‘jaligi vazirligi qoshidagi Bilim va innovatsiyalar milliy markazi (AKIS) o‘rtasida ilmiy-innovatsion, amaliy hamkorlikni rivojlantirish muhimligi qayd etildi.

Tadbir yakunida tomonlar o‘zaro oziq-ovqat va qishloq xo‘jaligi mahsulotlari yetkazib berish ko‘lamini oshirish bo‘yicha ham kelishib olishdi. Braziliyaning Embrapa tadqiqot markazi va O‘zR Qishloq xo‘jaligi vazirligi o‘rtasida onlayn videokonferensiyalar o‘tkaziladigan bo‘ldi. Shuningdek, Embrapa tadqiqot markazi va boshqa xususiy korxonalarni jalb etgan holda, Qishloq xo‘jaligi texnika va texnologiyasini ishlab chiqarishni mahalliylashtirishni ham  rejalashtirildi.