Qashqadaryoda urug‘lik g‘alla maydonlarida dala aprobatsiyasini o‘tkazishga bag‘ishlangan seminar bo‘lib o‘tdi

Qashqadaryo viloyatida O‘zR Qishloq xo‘jaligi vazirligi tomonidan Qoraqalpog‘iston Respublikasi, Xorazm, Navoiy, Buxoro, Samarqand, Surxondaryo va Qashqadaryo viloyatlari agrar soha vakillarining g‘allakorlari uchun uchun urug‘lik g‘alla maydonlarida dala aprobatsiyasi bo‘yicha ko‘rgazmali seminar bo‘lib o‘tdi. Ushbu seminarda 300 dan ortiq mutaxassislar ishtirok etdi.

Tadbirda qishloq xo‘jaligi vazirining birinchi o‘rinbosari Shuhrat Teshayev boshchiligidagi ekspertlar guruhi ishtirokchilarga foydali ma’lumotlarni taqdim etdi.

Dastlab qatnashchilar Janubiy dehqonchilik ilmiy-tadqiqot instituti tajriba maydonlarida sinovdan o‘tkazilayotgan xorijiy va mahalliy navlar, birlamchi urug‘chilik tizimi bilan tanishishdi. Jumladan, joriy yil hosilidan jamg‘ariladigan urug‘lik donning nav va avlodlar miqdori, birlamchi urug‘lik don yetishtirishda amalga oshirilgan ishlar hamda g‘alla maydonlarini aprobatsiya ko‘rigidan o‘tkazish tartibi to‘g‘risida mutaxassislarning ma’ruzalari tinglandi.

Tadbir davomida respublikada yuqori avlodli urug‘liklar jamg‘arish bo‘yicha o‘tgan yil yakunlari va ushbu yil hosili uchun boshoqli don ekinlari urug‘chiligi istiqbollari bo‘yicha mutaxassislar va ishtirokchilar o‘rtasida fikr mulohazalar almashildi.

Shuningdek, yangi yaratilayotgan va istiqbolli g‘alla navlarini Davlat nav sinash uchastkalariga topshirish va sinovdan o‘tkazish, urug‘lik g‘alla maydonlarida dala aprobatsiya ko‘rigini o‘tkazish tartiblari bo‘yicha Qishloq xo‘jaligi ekinlari navlarini sinash markazi raisi Sh. Nurmatovning ma’ruzasi ishtirokchilar uchun foydali bo‘ldi.

Ushbu seminar O‘zbekiston Respublikasi Prezidentining 2022-yil 28-yanvardagi ‘‘Qishloq xo‘jaligi ekinlari urug‘chiligini yanada rivojlantirish bo‘yicha qo‘shimcha chora-tadbirlar to‘g‘risida”gi PQ-106-son qarori yuzasidan urug‘lik don yetishtirish bo‘yicha belgilangan vazifalarni amalga oshirish maqsadida tashkil etildi.

Ma’lumot uchun: aprobatsiya –ma’lum bir navga mansub o‘simliklarning nav tozaligini yoki tipikligini, ekinlar orasida begona o‘tlar bo‘lishini, kasallik va zararkunandalar tomonidan zararlanishini aniqlash maqsadida urug‘likni dala sharoitida tekshirish jarayoni.