“Oziq-ovqat xavfsizligi, isteʼmol tizimi va strategiyasi” mavzusidagi davra suhbati

2019-yilning 23-oktabr kuni O‘zbekiston Respublikasi Prezidentining “O‘zbekiston Respublikasi qishloq xo‘jaligini rivojlantirishning 2020-2030-yillarga mo‘ljallangan strategiyasini tasdiqlash to‘g‘risida”gi PF-5853-son Farmoni imzolangan edi. Strategiyada mamlakat aholisini barqaror narxlardagi xavfsiz va sifatli oziq-ovqat mahsulotlari bilan taʼminlashga oid qator vazifalar belgilangan.

Ushbu vazifalar ijrosi yuzasidan Qishloq xo‘jaligi vazirligi hamda tegishli vazirlik va idoralar hamkorligida Yevropa Ittifoqining Qishloq xo‘jaligini qo‘llab-quvvatlash va soha bilimlarini oshirish dasturi (ASK FACILITY) texnik ko‘magi ostida xalqaro darajada tan olingan uslublar va ilg‘or tajribalar asosida oziq-ovqat xavfsizligi siyosati ishlab chiqilmoqda.

Shu munosabat bilan, joriy yilning 25-fevral kuni Toshkent davlat agrar universitetida Qishloq xo‘jaligi vazirligi hamda ASK FACILITY dasturi hamkorligida Oziq-ovqat xavfsizligi siyosatini tayyorlash bo‘yicha ishchi guruh aʼzolari ishtirokida “Oziq-ovqat xavfsizligi, isteʼmol tizimi va strategiyasi” mavzusida davra suhbati tashkil etildi.

Ushbu tadbirda qishloq xo‘jaligi vazir maslahatchisi Alisher Shukurov, ASK FACILITY dasturi rahbari, qishloq xo‘jaligi vazirining siyosiy maslahatchisi Edrian Nil, xorijiy ekspert – ASK FACILITY dasturining oziq-ovqat xavfsizligi va isteʼmol strategiyasi bo‘yicha katta maslahatchisi Dr. Tug‘rul Temel, BMTning Oziq-ovqat va qishloq xo‘jaligi tashkiloti, Iqtisodiy taraqqiyot va kambag‘allikni qisqartirish vazirligi, Investitsiyalar va tashqi savdo vazirligi, Moliya vazirligi, Sog‘liqni saqlash vazirligi, Suv xo‘jaligi vazirligi, Davlat statistika qo‘mitasi, Veterinariya va chorvachilikni rivojlantirish davlat qo‘mitasi, O‘simliklar karantini va himoyasi agentligi, Sanitariya-epidemiologik osoyishtalik va jamoat salomatligi xizmati tashkiloti, O‘zbekiston fermer, dehqon xo‘jaliklari va tomorqa yer egalari kengashi hamda «O‘zdonmahsulotlari» AK kabi tashkilotlar vakillari qatnashdi.

Davra suhbati avvalida Edrian Nil bugungi tadbirning asosiy maqsadi xalqaro ko‘rsatkichlarga asoslangan oziq-ovqat xavfsizligi va isteʼmolining zamonaviy tizimlarini ko‘rib chiqish, ekspertlar o‘rtasida tajriba almashish, shu bilan birga, O‘zbekiston oziq-ovqat xavfsizligi va isteʼmol strategiyasini rivojlantirish uchun axborot tizimini shakllantirishdan iborat ekaniga to‘xtalib o‘tdi.

Tadbir davomida xorijiy ekspert Dr. Tug‘rul Temel Birlashgan Millatlar Tashkilotining Oziq-ovqat va qishloq xo‘jaligi tashkiloti ko‘rsatkichlariga asoslangan zamonaviy oziq-ovqat xavfsizligi va isteʼmol tizimlari to‘g‘risida taqdimot o‘tkazdi.

Qishloq xo‘jaligi vazirining iqtisod, innovatsion rivojlanish va investitsiyalar masalalari bo‘yicha maslahatchisi Alisher Shukurov O‘zbekistonda oziq-ovqat xavfsizligi bo‘yicha davlat siyosatini ishlab chiqish jarayonini manfaatdor tashkilotlar bilan hamkorlikda va tizimli tashkil qilishning ahamiyati haqida so‘z yuritdi.

Davra suhbati yakunida tomonlarni qiziqtirgan masalalar muhokamasi bo‘lib o‘tdi. Jumladan, oziq-ovqat xavfsizligiga iqlim o‘zgarishi omillarining taʼsiri, aholining isteʼmol madaniyatini oshirish bo‘yicha takliflar bildirildi.

Tadbir oziq-ovqat xavfsizligini taʼminlashga qaratilgan davlat siyosatini ishlab chiqishga masʼul texnik guruh aʼzolari o‘rtasida samarali muloqotni taʼminlab, ularning hamkorlikdagi faoliyatini qo‘llab-quvvatlashga va yangi vazifalarni belgilab olishga xizmat qildi.

Qishloq xo‘jaligini qo‘llab-quvvatlash va soha bilimlarini oshirish dasturi (ASK FACILITY) – «O‘zbekiston Respublikasi qishloq xo‘jaligini rivojlantirishning 2020-2030-yillarga mo‘ljallangan strategiyasini» amalga oshirishda Yevropa Ittifoqining ko‘mak dasturi hisoblanadi.

Dastur, shuningdek, manfaatdor tomonlar, xususan, davlat, xususiy sektor vakillari va fuqarolik jamiyati o‘rtasida muloqot tashkil etish, tarmoq statistikasi nazoratini kuchaytirish, yo‘nalish tizimlarining baholash tartibini rivojlantirish orqali islohotlarning samarali ijrosini muvofiqlashtirishga yordam beradi.