SAMARQAND KONFERENSIYASI: QATAR VAZIRI BILAN UCHRASHUV O‘TKAZILDI

O‘zbekiston Qishloq xo‘jaligi vaziri Aziz Voitov Samarqandda o‘tayotgan oziq-ovqat xavfsizligi bo‘yicha xalqaro konferensiya doirasida xorijiy hamkasblari bilan ikki tomonlama uchrashuvlar o‘tkazdi.

Jumladan, Qatar munitsipalitet va atrof-muhit vaziri Abdulla bin Abdulaziz bin Turki as-Subayya bilan uchrashuvda tomonlar o‘rtasida qishloq xo‘jaligi sohasidagi hamkorlik aloqalarini mustahkamlash masalalari muhokama etildi. Aziz Voitov O‘zbekiston va arab mamlakatlari o‘rtasida agrar sohadagi hamkorliklar qadimdan mustahkam bo‘lib kelgani, bunda O‘zbekiston-Qatar munosabatlari alohida o‘rin tutishini bildirdi.

Qatar tomoni chorvachilikni rivojlantirish va oziq-ovqat xavfsizligini ta’minlash borasidagi hamkorlikka tayyor ekanligini bildirdi. Bu taklifni mamnuniyat bilan qabul qilgan O‘zbekiston Qishloq xo‘jaligi vaziri, o‘z navbatida, meva-sabzavotchilik yo‘nalishida ham ikki tomonlama hamkorlikni yo‘lga qo‘yish taklifni o‘rtaga tashladi. Bu taklif Qatar munitsipalitet va atrof-muhit vaziri tomonidan qabul qilinib, tegishli chora-tadbirlar ko‘rilishiga kelishib olindi.

Uchrashuv so‘ngida Qatar munitsipalitet va atrof-muhit vaziri Abdulla bin Abdulaziz bin Turki as-Subayya vazir Aziz Voitov va O‘zbekiston agrar sohasi vakillarini oktyabr oyida Qatarda o‘tkaziladigan “Qatar Expo” xalqaro ko‘rgazmasida qatnashishga taklif etdi.

Konferensiya ikki tomonlama uchrashuvlar va muhokamalarga boy o‘tmoqda.