Qishloq xo‘jaligi texnikalari ta'mirlanmoqda

Yurtimiz dehqonlari chigit ekish mavsumiga tayyorgarlikni boshlab yuborishgan. Ya’ni mavsum uchun zarur qishloq xo‘jaligi texnikalari qayta texnik ko‘rikdan o‘tkazilib, ta’mirlanmoqda.

Buxoro viloyati Vobkent tumanida ham “Buxoro Agrocluster” paxta-to‘qimachilik klasteri tomonidan joriy mavsumda foydalaniladigan jami 275 ta chopiq va haydov traktori, 275 ta kultivator, 1 ming 482 ta borona, 50 ta chizel, 39 ta chigit ekkich, 26 ta lazerli yer tekislash agregati, shuningdek, 16 ta purkagich, 24 ta “NRU–0,5” rusumli mineral o‘g‘it sepkich apparati texnik ko‘rikdan o‘tkazilib, ta’mirtalablari taxt qilinmoqda.

Ta’mirlash ishlarida temirchi, chilangar, payvandlovchi, bo‘yoqchi kabi mutaxassislardan tarkib topgan ikkita guruh yaqindan ko‘maklashmoqda. Ularning yordami bilan qishloq xo‘jaligi texnikalari parkida 80 ta traktor, 22 ta kombaynning texnik sozligi mutaxassislar ko‘rigidan o‘tkazilib, nuqson va kamchiliklar bartaraf qilindi.