Chorvachilik mahsulotlarini ishlab chiqarish uchun bo‘sh yer maydonlari qanday qilib ochiq elektron tanlovlarga chiqariladi?

O‘zbekiston Respublikasi Yer kodeksining 46 prim 1-moddasida:
bo‘sh turgan qishloq xo‘jaligiga mo‘ljallangan yer uchastkalari chorvachilik mahsulotini ishlab chiqarishga ixtisoslashganlarga ozuqa ekinlarini yetishtirish uchun (shartli bir bosh qoramol uchun) sug‘oriladigan yerlardan — kamida 0,3 gektar, lalmikor yerlardan — kamida 1 gektar, yaylovlar va pichanzorlardan — kamida 2 gektar bo‘lgan o‘lchamlarda ajratilishi belgilangan.
Bundan tashqari, Vazirlar Mahkamasining 2021-yil 24-noyabrdagi 709-sonli qarorida tuman (shahar) hokimliklari manfaatdor davlat tashkilotlari bilan birgalikda qishloq xo‘jaligiga mo‘ljallangan yer maydonlaridan samarali foydalanish, hududlarni ixtisoslashtirish, bo‘sh turgan, zaxiradagi va kelgusida zaxiraga olinadigan yer maydonlarini qishloq xo‘jaligi korxonasi yoki dehqon xo‘jaligi tashkil etish uchun ochiq elektron tanlovga chiqarish bo‘yicha loyihalarni tayyorlaydi hamda ko‘rib chiqish va tasdiqlash uchun xalq deputatlari tuman (shahar) Kengashining navbatdan tashqari sessiyasiga kiritadi. Kiritilgan loyihalar xalq deputatlari tuman (shahar) Kengashi tomonidan ma’qullangandan so‘ng, tuman (shahar) hokimligi qishloq xo‘jaligiga mo‘ljallangan yer maydonlarini ochiq elektron tanlovga qo‘yish choralarini ko‘radi.