Agrar sohada amalga oshiriladigan vazifalar belgilab olindi

Xabaringiz bor, kuni kecha Davlatimiz rahbari raisligida qishloq xo‘jaligida yangi zaxiralarni ishga solish hamda 2024-yilgi ustuvor  vazifalar yuzasidan videoselektor yig‘ilishi o‘tkazilgan va soha mutasaddilarga joriy yilgi mavsumda amalga oshirilishi lozim bo‘lgan vazifalar belgilab berilgan edi.

Bugun Qishloq xo‘jaligi vaziri Ibrohim Abdurahmonov boshchiligida  vazirlik va uning tizim tashkilotlari rahbarlari, boshqarmalar boshliqlari hamda mas’ul xodimlar ishtirokida Davlatimiz rahbarining videoselektor yig‘ilishida belgilab bergan vazifalar ijrosi,  xorijiy davlatlar bilan hamkorlikda amalga oshirilayotgan loyihalarning  bugungi holati, hamda ijro nazorati va fuqarolar murojaatlari bo‘yicha yig‘ilish o‘tkazildi.

Video-konferens-aloqa shaklida o‘tkazilgan yig‘ilishda dastlab, vazir Ibrohim Abdurahmonov ijro intizomi va fuqarolar murojaatlari bo‘yicha  to‘xtalar ekan, aholi tomonidan  qilingan har bir murojaat nafaqat insonlar taqdiriga, balki butun yurtdoshlarimiz uchun muhim ahamiyatga ega bo‘lgan agrar soha va oziq-ovqat xavfsizligidek muammolarning yechimiga  bog‘liq ekanligini, shu bois ularni e’tiborsiz qoldirmasdan o‘z vaqtida tegishliligi bo‘yicha mas’ul boshqarma va departamentlar bilan birgalikda o‘rganib chiqish  va hal etish  lozimligini aytib o‘tdi.

Videoselektor yig‘ilishida aytib o‘tilgan bog‘dorchilik, urug‘chilik, baliqchilik, parrandachilik, chorvachilik kabi yo‘nalishlarda  integratsiyani mustahkamlash va bu yo‘nalishlarda xorijiy davlatlar bilan rejalashtirilgan xalqaro loyihalarni amalga oshirish imkoniyatlari ko‘rib chiqildi.   

Shuningdek, yig‘ilishda Xitoy Xalq Respublikasi, Belarus, Qozog‘iston, Qirg‘iziston va Tojikiston Respublikalari bilan hamkorlikdagi loyihalarning bugungi kundagi holati tahlil qilinib, ularni  jadallashtirish bo‘yicha mutasaddi xodimlarga topshiriqlar berildi.

Bugun yurtimiz agrar tarmog‘ini  ilm-fan va innovatsiyalarsiz  tasavvur etib bo‘lmaydi. Shu bois Ibrohim Abdurahmonov  vazirlik tizimidagi  oliy o‘quv yurtlari talabalari va tizim tashkilotlarida mehnat qilayotgan yoshlar orasidan eng iqtidorli  yoshlar guruhini shakllantirish lozimligini ta’kidlar ekan, ushbu guruhning qanday faoliyat yuritishi va ularning agrar soha rivojiga qo‘shadigan hissasini ham aytib o‘tdi. Mazkur guruhni shakllantirish bo‘yicha Toshkent davlat agrar universiteti rahbariyati va  vazirlik yoshlar yetakchisiga  kerakli ko‘rsatmalar berdi.