HAMKORLIK YO‘NALISHLARI ANIQLASHTIRIB OLINDI

O‘zbekiston Qishloq xo‘jaligi vaziri hamda Vengriyaning “Bonafarm Group” kompaniyasi vakillarining onlayn-uchrashuvi o‘tkazildi.

Vazir Aziz Voitov O‘zbekiston vengriyaliklar bilan keng ko‘lamli hamkorlik uchun ochiq ekanligini, parrandachilik sohasida rejalashtirilayotgan loyiha ikki tomon uchun ham manfaatli bo‘lishini bildirdi.

O‘z navbatida, “Bonafarm Group” bosh direktori Atilla Chani O‘zbekiston xalqaro biznes hamjamiyatida ishonchli va istiqbolli hamkor sifatida katta obro‘ga ekanligini bildirib, mamlakatimiz qishloq xo‘jaligiga investitsiyalar olib kirish niyatida qat’iy ekanligini izhor qildi.

Aytish kerakki, joriy yil fevral oyida kompaniya delegatsiyasi O‘zbekistonda bo‘lib, mamlakatimizda parrandachilik sohasida yirik klasterni tashkil qilish imkoniyatlarini o‘rgangan edi.

Mazkur tashrif davomida erishilgan kelishuvlarning mantiqiy davomi o‘laroq, bu galgi uchrashuvda yirik investitsion loyihalar uchun O‘zbekistonda yaratilgan soliq, bojxona va boshqa imtiyozlar, qishloq xo‘jaligi sohasida amal qilib kelayotgan 40 dan ziyod turdagi subsidiyalar va boshqa imkoniyatlar haqida ma’lumot almashildi, parrandachilik klasteri uchun qulay yer tanlash va hamkorlikning boshqa nuqtalari atroflicha muhokama qilindi.

Uchrashuv yakunida loyihani joriy etish ishlarini jadallashtirishga kelishib olindi.

Ma’lumot uchun: “Bonafarm Group” kompaniyasi 2009-yilda tashkil topgan. Kompaniya aktivlari 1,9 mlrd dollar va aylanma mablag‘i 805 mln dollarni tashkil etadi. Unga tegishli korxona va xo‘jaliklarda 8,4 mingdan ziyod hodim faoliyat yuritadi. Kompaniya Vengriyada chorvachilik, vinochilik va parrandachilik sohalaridagi eng yirik kompaniyalardan biri hisoblanadi.