AGROTARMOQNI SUG‘URTALASH VA SUBSIDIYALASH IMKONIYATLARI KO‘RIB CHIQILDI

O‘zbekiston Qishloq xo‘jaligi vaziri Aziz Voitov “Mc KINSEY & COMPANY” kompaniyasining Markaziy Osiyo va O‘zbekistondagi vakillari bilan uchrashdi.

Uchrashuvda yurtimizda yetishtirilayotgan qishloq xo‘jaligi mahsulotlarining eksport hajmini oshirish uchun marketing tadqiqotlari o‘tkazish, sohada sug‘urta va subsidiya tizimini muvaffaqiyatli yo‘lga qo‘yish borasida hamkorlik qilish masalalari ko‘rib chiqildi.

Shuni alohida ta’kidlash kerakki, “Mc KINSEY & COMPANY” kompaniyasi qishloq xo‘jaligining ustuvor yo‘nalishlari bo‘yicha mijozlarni qo‘llab-quvvatlash, ularga turli ko‘rinishdagi yordam ko‘rsatish bo‘yicha boy tajribaga ega. Kompaniya shu kungacha turli davlatlarda qishloq xo‘jaligi mahsulotlari ishlab chiqaruvchilarni subsidiyalash tizimini optimallashtirish, qishloq xo‘jaligi ekotizimlarini rivojlantirish, agrotarmoqni raqamlashtirish, qishloq xo‘jaligi mahsulotlarining eksport hajmini oshirish kabi yo‘nalishlarda ko‘plab loyihalarni muvaffaqiyatli amalga oshirgan.

Muloqot chog‘ida kompaniyaning Ozarbayjon qishloq xo‘jaligi sohasini sug‘urtalash hamda mahsulot yetishtiruvchi va ularni qayta ishlovchilarga subsidiyalar ajratish mexanizmini yaratish bo‘yicha amalga oshirilgan ishlariga ham alohida to‘xtalib o‘tildi.

O‘z o‘rnida kompaniya vakillari mamlakatimizda agrotarmoqni sug‘urta qilish va ishlab chiqaruvchilarni subsidiyalash yo‘nalishlarida hamkorlik qilishga tayyorligini hamda bu bo‘yicha ijobiy natijalarga erishishga intilayotganini bildirib o‘tdi.

Uchrashuv davomida tomonlar joriy yilning 12-iyunida O‘zbekiston qishloq xo‘jaligi sohasi xodimlari uchun qishloq xo‘jaligi mahsulotlarining eksport salohiyatini oshirish imkoniyatlari, oziq-ovqat xavfsizligi, qishloq xo‘jaligi ekinlarini sug‘urtalashning ahamiyati, qishloq xo‘jaligi mahsulotlarini yetishtiruvchilar va ularni qayta ishlovchilar uchun subsidiyalar ajratish tizimini takomillashtirish kabi mavzular bo‘yicha seminar o‘tkazishga kelishib oldilar.