SURXONDARYO O‘RIKLARI – XORIJ BOZORIGA

Surxondaryo mamlakatimiz janubida joylashgani bois, aksariyat meva sabzavotlar respublikada birinchilardan bo‘lib aynan ushbu viloyatda pishib yetiladi.  Ayni damda vohaning mirishkor bog‘bonlari tomonidan  yetishtirilgan o‘rik terimi  qizg‘in pallada. Hosilning aksariyat qismi eksportga yo‘naltirilmoqda.

O‘rikzorlar oralar ekansiz, viloyat qishloq xo‘jaligi korxonalari agrotexnik tadbirlarni izchil o‘tkazishga alohida e’tibor bergani, jumladan tomchilab sug‘orish texnologiyasi joriy etilgani sababli, daraxtlar serhosil ekanligini ko‘rasiz.

Jumladan, Termiz tumanida bog‘larida ham ko‘chatlar yaxshi tanlangani, ular parvarishiga ilmiy asosda, mehr bilan yondashilgani tufayli, o‘riklar keyingi yiliyoq hosilga kirgan. Bu yil asosiy hosil terib olinib, eksportga jo‘natilmoqda.

Agronom Muhriddin Davronov o‘z xo‘jaligi haqida so‘zlay turib, yurtimizda qishloq xo‘jaligida yaratilgan yengilliklarga to‘xtaldi: “Muhtaram Prezidentimiz tadbirkorlarga keng yo‘l ochib berganining samarasi o‘laroq, bugungi kunda bog‘da ishlar tobora kengayib bormoqda, jumladan joriy yilda biz ham bog‘imiz maydonini kengaytirib, 500-1000 gektarga yetkazishni rejalashtirganmiz. Natijada mahalliy aholidan 150 nafarini ish bilan ta’minlashga muvaffaq bo‘ldik”.