O‘SIMLIKLARNI HIMOYA QILISH DOIRASIDAGI XALQARO HAMKORLIK

2-mayda BMT Oziq-ovqat va qishloq xoʻjaligi tashkiloti (FAO)ning Dehqonchilik va oʻsimliklarni himoya qilish boʻlimi direktori janob Jingyuan Sya va uning texnik maslahatchisi Hafiz Moʻminjonov Toshkentga keldi.

FAO missiyasining asosiy maqsadi FAO mintaqaviy tadbiri hamda Yevropa va Markaziy Osiyoda OCOP (“Bir mamlakat – bir mahsulot”) mamlakatbay loyihalarni amalga oshirish bo‘yicha seminarda, shuningdek, OCOP Milliy ishchi guruhining O‘zbekistonda o‘tkaziladigan birinchi yig‘ilishida ishtirok etishdan iborat. Tadbirda mintaqaviy va milliy darajadagi ustuvor yo‘nalishlar, xususan, OCOP tashabbusini mintaqada amalga oshirish masalalari muhokama qilinadi.

Missiya doirasida xorijiy mehmonlar FAOning mamlakatimizdagi vakolatxonasi va O‘zbekiston Respublikasi Qishloq xo‘jaligi vazirligidagi hamkasblari bilan uchrashib, mamlakatda o‘simliklarni himoya qilish bilan bog‘liq asosiy tadbirlarni, xususan, OCOP tashabbusini amalga oshirish masalalarini muhokama qiladi.

Bundan tashqari, rasmiy tadbirlar yakunlangach, missiya aʼzolari OCOP tashabbusi uchun ustuvor qishloq xoʻjaligi mahsulotini tanlash maqsadida  fermer xoʻjaliklariga tashrif buyurishni hamda qishloq xoʻjaligi ilmiy-tadqiqot, konsultatsiya, taʼlim va qishloq xoʻjaligi obyektlari bilan tanishishni rejalashtirgan. Chet ellik mehmonlar OCOP tashabbusini yanada ilgarilatishni muhokama qilish uchun mahalliy olimlar va ekspertlar, yirik fermer xo‘jaliklari va boshqa manfaatdor tomonlar bilan uchrashishlari va muloqot qilishlari ham ko‘zda tutilgan.

OCOP Milliy ishchi guruhining birinchi yig‘ilishi bilan bir qatorda o‘tkaziladigan tadbir va seminar mamlakatimizda o‘simliklarni himoya qilishni rivojlantirish va OCOP tashabbusi doirasidagi ishlarni kuchaytirishga alohida hissa qo‘shishi kutilmoqda.

Tashrif 6-maygacha davom etadi.