O‘ZBEKISTON VA BAVARIYA O‘RTASIDA QISHLOQ XO‘JALIGI SOHASIDAGI HAMKORLIK

17-aprel kuni Bavariya federal yeri Oziq-ovqat, qishloq va o‘rmon xo‘jaligi vaziri o‘rinbosari Hubert Bittlmayer boshchiligidagi delegatsiya mamlakatimizga tashrif buyurdi.

Uch kun davom etadigan ushbu tashrifdan nemis tomoni O‘zbekiston bilan bir nechta soha, xususan qishloq xo‘jaligida ham ko‘pgina yo‘nalishlar bo‘yicha hamkorlikni yo‘lga qo‘yishni maqsad qilgan. Jumladan, qishloq xo‘jaligi mahsulotlarini yetishtirish, qayta ishlash, chorva mollarini saqlash va ularni tashish, yuqori mahsuldor qoramollar embrioni va urug‘lik materiallarini yetkazib berish, sohani raqamlashtirish kabi yo‘nalishlarda hamkorlik qilish ko‘zda tutilgan. Shuningdek, hamkorlik aloqalari ilmiy-tadqiqot institutlari o‘rtasidagi o‘zaro tajriba almashishni yo‘lga qo‘yish, kadrlar tayyorlash va ularning malakasini oshirish, suvni tejovchi smart-texnologiyalarni joriy etishda o‘zbek tomoni tajribasini o‘rganishni ham amrab oladi. Tashrif davomida Bavariya delegatsiyasi mahalliy chorvachilik korxonalari, yirik qishloq xo‘jaligi va oziq-ovqat mahsulotlarini ishlab chiqarish va qayta ishlash majmualarining faoliyati bilan tanishishi ham rejalashtirilgan.

Ilk tashrif manzili Toshkent viloyati Parkent tumanidagi “Samsarak shirin sut” fermer xo‘jaligi bo‘ldi. Changi qishlog‘idagi ushbu chorva kompleksi 2018-yilda tashkil etilgan bo‘lib, hozirda bu yerda 1000 bosh yirik shoxli qoramol boqilmoqda. Sut yo‘nalishiga ixtisoslashgan ushbu kompleksning kunlik sut ishlab chiqarishi 12 tonnaga teng, sigirlar kuniga ikki marotaba sog‘iladi. Darvoqe, bu yerdagi qoramollar asosan Germaniya va Avstriyadan olib kelingan bo‘lib, “Golshtin” va “Simmental” zotiga mansub. Ushbu chorvachilik kompleksi tuman va boshqa hududlar aholisining ehtiyojlarini qondirish uchun go‘sht va sut mahsulotlarini yetkazib bermoqda.

Mehmonlar chorva kompleksidagi mollarni saqlash, yangi tug‘ilgan buzoqlarni saqlash, oziqlantirish, sut sog‘ish xonalarini ko‘zdan kechirishdi. Chorva xo‘jaligi keng tog‘ yon bag‘rida joylashgani bois, har bir chorva moli uchun 30 sotixdan yer maydoni to‘g‘ri keladi va bu ularning bahavo maskanda erkin parvarishlanishini taʼminlaydi. Aynan ushbu jihat nemis tomonning eʼtiborini tortdi.

Bavariya federal yeri Oziq-ovqat, qishloq va o‘rmon xo‘jaligi vaziri o‘rinbosari Hubert Bittlmayer chorva kompleksini ko‘zdan kechirish mobaynida o‘z taassurotlari bilan o‘rtoqlashdi:

“Bu yerdagi shart-sharoitlar bilan tanishdik, bizga yoqdi. Kelajakda mamlakatingizdagi chorvachilik xo‘jaliklari bilan genetika yo‘nalishida hamkorlik qilish niyatimiz bor. Shuningdek, o‘zimizning tajribalarimizga asoslangan holda, ushbu xo‘jaliklarni texnik taʼminoti bo‘yicha ham kelishuvlarga erishmoqchimiz. Chorva mollari va ularning ozuqalarini tayyorlashda keng maydonlar mavjudligi quvonarli holat va ushbu yerlarga suv tejovchi texnologiyalarni jalb etish bo‘yicha hamkorlikka erishsak, maqsadga muvofiq bo‘ladi”.

O‘zbekiston qishloq xo‘jaligi sohasidagi amaliy ishlar bilan tanishgach, nemis delegatsiyasi Qishloq xo‘jaligi vaziri Aziz Voitov bilan uchrashdi.

Mehmonlarni O‘zbekiston qishloq xo‘jaligi bilan yanada yaqinroq tanishtirish maqsadida Qishloq xo‘jaligi vazirligi tizimidagi raqamlashtirish jarayonlariga eʼtibor qaratildi. Bunda Geoportal tizimining o‘ziga xosligi, imkoniyatlari hamda dehqon va fermer xo‘jaliklari uchun berilayotgan foydali maʼlumotlar, agrosubsidiya bo‘yicha olib borilayotgan ishlarga to‘xtab o‘tildi. Bavariya federal yeri Oziq-ovqat, qishloq va o‘rmon xo‘jaligi vaziri o‘rinbosari Hubert Bittlmayer O‘zbekistonning ekin maydonlarida ekiladigan ekinlar va ularni oldindan prognoz qilish qanday amalga oshirilishi masalalari bilan qiziqdi va O‘zbekiston tomonidan batafsil javoblar oldi.  

Shundan so‘ng mehmonlarning Toshkent davlat agrar universitetiga tashrifi boshlandi. Universitet rahbariyati bilan uchrashuvda Toshkent davlat agrar universiteti birinchi prorektori Sohib Islomov universitet tarixi, faoliyati va rejadagi ishlar xususida to‘xtalib o‘tdi. O‘z o‘rnida, Bavariya tomoni agrar taʼlim sohasida hamkorlik qilishga tayyor ekanligini bildirib, soha taʼlimiga oid bir qancha takliflarni ilgari surdi. Jumladan, Bavariyadagi agrar universitetlar bilan ikki tomonlama tajriba almashinuvini tashkil etish, mutaxassislarni malaka oshirish uchun OTMga yuborish, Toshkent davlat agrar universitetidagi talabalarni ikkinchi bosqichdan Bavariyada o‘qishini davom ettirishini ta’minlash va bu talabalarga ikki tomonlama diplom berish masalalari muhokama qilindi.

– Albatta, biz taklif qilayotgan bu masalalarning ijrosi hozirda oson tuyulishi mumkin. Ammo talabalarning ikki davlatda o‘qib, ikkita diplomga ega bo‘lishi uchun bizning o‘z talablarimiz bor. Bavariyada taʼlimga katta eʼtibor qaratiladi va bizning diplomga ega bo‘lgan talabalar sohani juda yaxshi biladigan va bilimlarini o‘z o‘rnida qo‘llay oladigan yetuk mutaxassislar bo‘lishlari kerak. Ana shundagina biz bunday hamkorlikka rozi bo‘lamiz. Shuningdek, biz bo‘lajak mutaxassislar o‘zi egallaydigan sohani haqiqiy egasi bo‘lishi uchun o‘quv markazlarimizdagi malaka oshirish kurslarini taklif etmoqchimiz. Bunda talaba nafaqat nazariyani, balki amaliyotni ham o‘rganib, soha bilimdoniga aylanadi. Biz O‘zbekiston tomoniga mamlakatimizdagi aynan qishloq xo‘jaligi sohasiga oid taʼlim tizimidan kelib chiqib, takliflar berdik. Ularni birgalikda muhokama qilib, yanada takomillashtirishimiz mumkin,- dedi Bavariya delegatsiyasi vakili  doktor Aram Aristakesyan.

Samimiy, do‘stona ruhda va takliflarga boy tarzda kechgan uchrashuv yakunida Toshkent davlat agrar universiteti tomonidan mehmonlarga yurtimizning go‘zal maskanlari ramzi tushirilgan esdalik sovg‘alari topshirildi va birgalikda suratga tushildi.