INTENSIV BOG‘LAR VA KICHIK AGROLOGISTIKA MARKAZLARINI YARATISH MEXANIZMLARI TAKOMILLASHTIRILMOQDA

2023-yil 8-aprelda Farg‘ona viloyatida “Intensiv bog‘lar va kichik agrologistika markazlarini yaratish mexanizmlarini takomillashtirish” mavzusida mintaqaviy ilmiy-amaliy seminar bo‘lib o‘tdi. Videokonferensaloqa shaklida o‘tkazilgan ushbu tadbirda Qishloq xo‘jaligi vaziri Aziz Voitov ham ishtirok etdi.

Vazir o‘z nutqida, Prezidentning “2023-yilda qishloq xo‘jaligi mahsulotlarini ishlab chiqarish, qayta ishlashni kengaytirish va qo‘llab-quvvatlashning qo‘shimcha chora-tadbirlari to‘g‘risida”gi PQ-113-sonli qaroriga binoan, sohaga berilayotgan yangi imtiyozlar va imkoniyatlar haqida maʼlumotlar taqdim etdi. Shuningdek, Aziz Voitov qishloq xo‘jaligi korxonalarini moliyalashtirishda mavjud muammolarni bartaraf etish va fermerlar, klasterlar va tadbirkorlarning og‘irini yengil qilish bo‘yicha Prezident qarori bilan yangi mexanizmlar joriy etilayotganiga e’tibor qaratdi.

O‘zbekiston Respublikasi Qishloq xo‘jaligi vazirligi huzuridagi Oziq-ovqat va qishloq xo‘jaligi sohasida strategik rivojlanish va tadqiqotlar xalqaro markazi, Qishloq xo‘jaligida xizmatlar ko‘rsatish agentligi hamda “Agroservis operator” DUK va Farg‘ona viloyati hokimligi hamkorligida tashkil etilgan ushbu seminar qishloq xo‘jaligi sohasida faoliyat yurituvchi tadbirkorlar va fermerlarni xalqaro moliya institutlarining mablag‘lari hisobidan zamonaviy intensiv bog‘lar va kichik agrologistika markazlarini tashkil etish imkoniyatlari bilan tanishtirish maqsadida tashkil etildi.

Tadbirda qulay agrobiznes-iqlim va raqobatbardosh, xalqaro bozorlar uchun eksportga yo‘naltirilgan qishloq xo‘jaligi mahsulotlari, mamlakatimiz qishloq xo‘jaligi ilmiy-tadqiqot muassasalarining faoliyatini tubdan isloh qilish va ularning moddiy-texnik bazasini jahon tajribasi asosida yangilash, innovatsiya va agroxizmatlar tizimini keng joriy etish mavzulariga alohida to‘xtalib o‘tildi. Shuningdek, xizmatlar turlarini takomillashtirish, sohada kooperatsion munosabatlarni rivojlantirishni qo‘llab-quvvatlash va Jahon banki bilan hamkorlikni yanada kengaytirish masalalari ham muhokama etildi.

Tadbir davomida ishtirokchilarga quyidagi  loyihalarining imkoniyatlari to‘g‘risida batafsil maʼlumotlar berildi:

• “Zamonaviy intensiv bog‘lar va kichik agrologistika markazlarini yaratish mexanizmlari”;
• “Qishloq xo‘jaligini diversifikatsiya va modernizatsiya qilish» loyihasi doirasida tadbirkorlar uchun rivojlanish va o‘sish imkoniyatlari”;
• “Jahon banki ishtirokidagi «Farg‘ona vodiysida qishloq tadbirkorligini rivojlantirish» loyihasi doirasida tadbirkorlik faoliyatini qo‘llab-quvvatlash”;
• “Meva-sabzavotchilik tarmog‘ida qo‘shilgan qiymat zanjiri yaratishni rivojlantirish (2-bosqich)”;
• Xalqaro tiklanish va taraqqiyot banki ishtirokidagi “O‘zbekiston Respublikasida meva-sabzavotchilik tarmog‘ini rivojlantirish” va “O‘zbekiston Respublikasi Qishloq xo‘jaligini modernizatsiya qilish”.

Qizg‘in muhokama va munozaralarga boy tarzda o‘tgan ushbu seminar kelgusida qishloq xo‘jaligi sohasidagi islohotlarda muhim  qadam bo‘ladi.