ILMIY-TADQIQOT INSTITUTIDA KUZGI BUG‘DOYDAN YUQORI HOSIL OLISH USULI YARATILDI

O‘zbekiston Respublikasi qishloq xo‘jaligi vazirligi huzuridagi Janubiy dehqonchilik ilmiy-tadqiqot institutida qishloq xo‘jaligi ekinlaridan yuqori va sifatli hosil yetishtirish bo‘yicha bir qator ishlar olib borilmoqda. Jumladan, o‘simliklarning yangi navlarini yaratishda issiqlik, qurg‘oqchilik va sho‘rga chidamlilik darajasi o‘rganilib, zarur xulosa va tavsiyalar ishlab chiqilmoqda.

Institutning “O‘simliklar fiziologiyasi va biokimyosi” laboratoriyasida quyidagi tahlillar amalga oshiriladi:

• O‘simliklarni barg orqali issiqlik, qurg‘oqchilik va sho‘rga chidamlilik darajasini o‘rganib, tahlil qilish;
• Ekinlarning o‘sish-rivojlanish davrlari bo‘yicha biomassa to‘planishi, barg sathi, fotosintez sof mahsuldorlik, xlorofill donachalari miqdorini aniqlash;
• Mineral va organik o‘g‘itlar hamda o‘simlikning o‘sishini sozlovchi regulyatorlarning o‘sish-rivojlanish davrlarida kechadigan fiziologik va biokimyoviy jarayonlarga taʼsirini aniqlash, tahlil qilish va xulosa berish;
• Boshoqli don va dukkakli ekinlarining urug‘ sifat ko‘rsatkichidan natura og‘irligi, shishasimonlik darajasi, oqsil miqdori, kleykovina miqdori va sifati, urug‘ning biokimyoviy tarkibini aniqlab, tahlil qilish;
• Ekishdan oldin ekinlarning unuvchanlik darajasi, urug‘larni dorilashda qo‘llaniladigan preparatlar samaradorligini aniqlab, tahlil qilish.

Laboratoriya tajribalari shuni ko‘rsatdiki, kuzgi bug‘doy yetishtirishda mineral o‘g‘it qo‘llashni qisqartirib, uning o‘rniga To‘platuvchi hamda boshoq chiqarish davrida Boshoqlatuvchi shuningdek, Fitobiosol stimulyatorlari bilan bargdan oziqlantirish, o‘simlikning o‘sishi va rivojlanishini yaxshilash, fotosintez jarayonini faollashtirish orqali 42,6-46,9 sentnergacha hosil olish imkonini yaratdi.

IFO COMBi Fe stimulyatorlari bilan  har gektariga 1,0  litr miqdorida bargdan oziqlantirish don sifat ko‘rsatkichining yaxshilanishini taʼminladi.