ILMIY TADQIQOT INSTITUTIDA “ONALAR BOG‘I” YARATILDI

Davlatimiz rahbarining  2021-yil 30-dekabrda qabul qilingan “Ko‘kalamzorlashtirish ishlarini jadallashtirish, daraxtlar muhofazasini  yanada samarali tashkil etish chora-tadbirlari to‘g‘risida”gi Farmoni bilan yurtimizda Yashil makon umummilliy loyihasi  doirasida  keng qamrovli ishlar amalga oshirilmoqda. Xususan, O‘zbekiston Qishloq xo‘jaligi vazirligi tizimidagi  tashkilotlar va  ilmiy tadqiqot institutlarida ham bu borada izchil ishlar amalga oshirilmoqda. Ko‘zlangan maqsad yagona. U ham bo‘lsa  mevali  va manzarali daraxt ko‘chatlarini ekish orqali yurtimizda atrof-muhitni muhofaza qilish, ko‘kalamzorlashtirish va ekologik holatni yaxshilash. Bu yil bahorning  ilk kunlaridan  vazirlik huzuridagi Sabzavot, poliz ekinlari va kartoshkachilik ilmiy tadqiqot institutida ham “Onalar bog‘i” bunyod etildi.

Faxriddin Rasulov Sabzavot, poliz ekinlari va kartoshkachilik ilmiy tadqiqot instituti ilmiy kotibi: “Onalar bog‘i”ni institutimizning yetakchi olima ayollaridan  biri bo‘lgan Yekaterina Lyan  nomi bilan  bog‘ladik. U o‘z mehnat faoliyati davomida aynan sabzavot seleksiyasi, urug‘chiligi bo‘yicha  o‘zining ko‘plab ilmiy ishlari bilan soha rivojlanishiga hissa qo‘shgan olimlarimizdan biri. Bundan tashqari  yurt ravnaqi uchun hissa qo‘shadigan farzandlarni  ham tarbiyalab voyaga yetkazgan.  Shu sababli u Onalar bog‘ining bir timsoli bo‘ldi.

Darhaqiqat, olima  Yekaterina Lyan tomonidan yaratilgan nav va duragaylar respublikamizning dehqonchilik xo‘jaliklarida keng foydalanilmoqda. Quvonarlisi, xorijiy davlatlar  Qozog‘iston Respublikasi, Rossiyaning Qrim, Novgorod shaharlarida hamda Primorskoe, Petropavlovsk,  Kamchatka o‘lkalarida ham yetishtirilmoqda.

Yekaterina Lyan ilmiy tadqiqot ishlarini olib borishdan tashqari, himoyalangan maydonlarda yetishtirilayotgan sabzavot ekinlarining hosildorligini oshirish, kasalliklardan himoya qilish bo‘yicha yetuk mutaxassis sifatida O‘zbekistonda tanilgan olimalarimizdan biridir. U pomidorning gulqand, abamariya, subhidam, sayxun,  cheremarvarid, turon kabi o‘ndan ortiq navlarning muallifi va hammuallifidir.  Aynan  institut hududida tashkil etilgan Onalar bog‘i esa  mamlakatimiz qishloq xo‘jaligi rivojiga,  xususan, sabzavot ekinlarining   yangi navlarini yaratishga o‘z hissasini qo‘shgan olima ayollarimizni yosh avlodga eslatib turish, ularga motivatsiya berish bilan birga yurtimizdagi yashil maydonlarning oshishi va atrof-muhit ozodaligini ta’minlashda katta ahamiyatga ega.