QISHLOQ XO‘JALIGI TEXNIKALARI MAVSUMGA TAYYOR

“Ish quroling soz bo‘lsa mashaqqating oz bo‘lar” deb bekorga aytishmagan donolarimiz. Qaysi sohada faoliyat yuritishingizdan qat’iy nazar ish qurolingiz pand bersa, mehnat unumdorligiga  salbiy ta’sir ko‘rsatadi.  Aynan qishloq xo‘jaligida esa bu iboraning ahamiyati juda katta. Shu bois ishning ko‘zini biladigan bobo dehqon-u, mirishkor  fermerlarimiz hali yerlar yetilmasdan turib, qishloq xo‘jaligi texnikalarini yangi mavsumga taxt qilib qo‘yishga odatlanishgan.  Bu borada vodiyning  tinib-tinchimas  dehqonlari oldiga tushadigani yo‘q. Jumladan Farg‘ona viloyatining Rishton tumanidagi “Rusuzbekteks” xorijiy korxonasiga qarashli klasterning Markaziy MTPda ham qishloq xo‘jaligi texnikalarini bahorgi ekish ishlariga tayyorgarlik yakunlandi. Hozirda ushbu maskanda 14 ta yuqori unumli texnikalar mavjud. Shulardan 9 tasi klasterga, 5 tasi fermer xo‘jaliklariga tegishli. Jami 147 ta kultivatsiya traktorlari mavjud bo‘lib, bular ham to‘liq taʼmirdan chiqarilib, mavsumga shay holatga keltirib qo‘yilgan.

2023-yilda klasterga qo‘shimcha yangi texnikalar olib kelindi. Ushbu texnikalarning afzalligi shundaki, ular ekish va o‘g‘itlash jarayonini bira to‘la bajarib ketaveradi.

Joriy yilda klaster xo‘jaligi yer maydonida 5 700 gektarga paxta ekish rejalashtirilgan. 232 nafar fermer xo‘jaligi bilan paxta xomashyosini yig‘ib terib olish bo‘yicha qonuniy shartnoma tuzilgan. 2023-yilda gektariga 37 sentnerdan hosil olish ko‘zda tutilmoqda.

Paxta yetishtirishda va texnikalarning soz ishlashida Markaziy MTP vakillari Qishloq xo‘jaligi vazirligi mutaxassislari, vazirlik huzuridagi ilmiy markazlarning xodimlari, fan nomzodlari, olimlari, agrar sohadagi oliygohlar talabalari va Turkiya, Rossiya davlatlarining agrar soha vakillari bilan hamkorlik qilishmoqda.

Videolavhamizda “Rusuzbekteks” xorijiy korxonasiga qarashli Markaziy MTPda mavsumga tayyorgarlik ishlari haqida hikoya qilinadi.