“GREEN WEEK 2023” O‘ZBEKISTON ISHTIROKI NATIJALARI

Berlinda 84-Xalqaro oziq-ovqat ko‘rgazmasi – “Green week 2023” nihoyasiga yetmoqda. Ko’rgazma davomida butun dunyodan 1 700 dan ortiq eksponentlar dunyo miqyosida shuhrat qozongan eng xilma-xil mahsulotlarning 100 mingga yaqin turini namoyish etishga muvaffaq bo’ldi.

Ushbu ko’rgazma doirasida oziq-ovqat bilan bog’liq 300 dan ortiq turli forumlar, seminarlar, kongresslar va uchrashuvlar tashkil etildi va o’tkazildi.

Mazkur nufuzli qishloq xo‘jaligi ko‘rgazmasida mamlakatimiz ham ishtirok etmoqda. 240 kvadrat metr maydonga ega O‘zbekiston stendida mamlakatimizning barcha hududlaridan 60 dan ortiq tadbirkorning milliy mahsulotlari namoyish etilmoqda. Jumladan: 227 turdagi qishloq xoʻjaligi va oziq-ovqat mahsulotlari – yangi va qayta ishlangan meva-sabzavotlar, sut va goʻsht mahsulotlari, yogʻ va yogʻ mahsulotlari, salqin ichimliklar, qandolat mahsulotlari, un va un mahsulotlari va boshqalar.

Ma’lumot uchun: Germaniya Oziq-ovqat va qishloq xo‘jaligi federal vaziri Jem O‘zdemir, Yevropa Ittifoqining qishloq xo‘jaligi bo‘yicha komissari Yanush Voytsexovski, Berlin meri Fransiska Giffi va boshqa hurmatli mehmonlar ko‘rgazma bo‘ylab sayohatni O‘zbekiston stendidan boshladilar.

Ko‘rgazma doirasida qishloq xo‘jaligi va oziq-ovqat bo‘yicha XV Butunjahon forumi, shuningdek, qishloq xo‘jaligi vazirlarining Berlin konferensiyasi bo‘lib o‘tdi, unda 71 nafar vazir va 15 nafar xalqaro tashkilot rahbarlari ishtirok etdi.

Kun tartibida inklyuziv va inqirozga chidamli oziq-ovqat tizimlarini rivojlantirish va ilgari surish, barqaror oziq-ovqat zanjirlarini rag‘batlantirish qoidalari asosida savdoni qo‘llab-quvvatlash masalalari muhokama qilindi. BMTning 2030-yilgi kun tartibidagi “Nol ochlikka” erishish maqsadiga barcha uchun oziq-ovqat mahsulotlarining mavjudligi va xavfsizligini ta’minlash masalasiga alohida e’tibor qaratildi.

O‘zbekiston Qishloq xo‘jaligi vaziri Aziz Voitov o‘z nutqida konferensiya mazmunidan kelib chiqib ta’kidladi:

“Yangi siyosatning asosini tartibga solish, inklyuzivlik, ekologik barqarorlik va samaradorlik o‘sishini rag‘batlantirish tashkil etadi. Mamlakatda “O‘zbekiston qishloq xo‘jaligini 2030-yilgacha rivojlantirish strategiyasi”, shuningdek, Barqaror rivojlanish maqsadlarining oziq-ovqat tizimi bilan bog‘liq barcha asosiy ko‘rsatkichlarini takomillashtirishga xizmat qiluvchi qator davlat tarmoq dasturlari qabul qilingan. Bu borada suv resurslari, energiya, oziq-ovqat va atrof-muhit o‘rtasidagi munosabatlarni mustahkamlaydigan “Yashil iqtisodiyot”ga o‘tishimiz ham birdek muhim”.

“Green week 2023” doirasida Qishloq xo‘jaligi vaziri Aziz Voitov boshchiligidagi O‘zbekiston delegatsiyasi Germaniya, Fransiya, Gruziya, Turkiya, Latviya, Kanada, Mo‘g‘uliston, Polsha, Vengriya, Niderlandiya Qozog’iston qishloq xo‘jaligi, Bavariya Federal Davlati vazirlari shuningdek, FAO, IFAD, Jahon banki rahbarlari bilan bir qator uchrashuv va muzokaralar o‘tkazdi.

Umumiy qiymati 575 million dollardan ortiq bo‘lgan 12 ta loyiha hamda 154 million dollarlik savdo shartnomalarini ikki tomonlama amalga oshirishga kelishildi.