NATIJADORLIKKA YOʻNALTIRILGAN IXCHAM VA PROFESSIONAL DAVLAT BOSHQARUVI TIZIMINI YARATISH

OʻzR Qishloq xoʻjaligi vazirligida vazir Aziz Voitov boshchiligida 2023-yilda amalga oshiriladigan dolzarb masalalar yuzasidan yigʻilish boʻlib oʻtdi.

Yigʻilishda Qishloq xoʻjaligi vazirligi huzuridagi barcha tizim tashkilot rahbarlari ishtirok etdi. Aziz Voitov 2022-yil 21-dekabrdagi Oʻzbekiston Respublikasi Prezidentining PF-269-son Farmoni hamda PQ-447-son Qarori asosida Davlat boshqaruvida bir qator muhim islohotlar amalga oshirilishi belgilanganligini aytib oʻtdi. Shundan kelib chiqib, Veterinariya va chorvachilikni rivojlantirish qoʻmitasi, Ipakchilik va jun sanoatini rivojlantirish qoʻmitasi, Oʻsimliklar karantini va himoyasi agentligi, Agrosanoat majmui ustidan nazorat qilish inspeksiyasi Vazirlik huzuriga oʻtkazildi.

Shuningdek, “Oʻzbekchorvanasl” agentligi tugatilib, funksiya va vazifalari Veterinariya va chorvachilikni rivojalantirish qoʻmitasiga, Alkogol va tamaki bozorini tartibga solish hamda vinochilikni rivojlantirish agentligining vazifalari Qishloq xoʻjaligi vazirligiga oʻtkazilganligi, Bogʻdorchilik va issiqxona xoʻjaligini rivojlantirish agentligi negizida Qishloq xoʻjaligida xizmatlar koʻrsatish agentligi qayta tashkil etilishi maʼlum qilindi.

OʻzR Prezidentining “Qishloq xoʻjaligi vazirligi faoliyatini tashkil qilish chora-tadbirlari toʻgʻrisida”gi qarori asosida vazirlik va tizim tashkilotlarining tashkiliy tuzilmalari hamda markaziy apparati, hududiy boʻlinmalarining shtat birliklari qayta koʻrib chiqiladi.

Ushbu islohotlar idoralar oʻrtasida vazifalarni takrorlanishini oldini olish, agrar sohani boshqaruv tizimini maqbullashtirish boʻyicha keng koʻlamli islohotlarni olib borish hamda mavjud muammolarni tezkor hal qilish imkoniyatini kengaytiradi.

2023-yilda vazirlikning asosiy faoliyat yoʻnalishlarida quyidagi ishlar tashkil etilishi koʻrsatib oʻtildi, jumladan, yer va suv resurslaridan samarali foydalanish yoʻnalishi, mahsulotlar ishlab chiqarish hajmlarini kamida 5 foiz oʻsishini va oziq-ovqat xavfsizligini taʼminlash yoʻnalishi, chorvachilik, pillachilik tarmoqlarini rivojlantirish va veterinariya soahalarini muvofiqlashtirish yoʻnalishi, oʻsimliklar karantini va himoyasi sohasi hamda qishloq xoʻjaligi sohasidagi qonunchilik talablariga rioya etish yoʻnalishlari boʻyicha vazifalar belgilab olindi.

Yigʻilishda Vazir oʻrinbosarlari hamda qoʻmita rahbarlari, vazirlik boshqarma boshliqlariga yoʻnalishlari boʻyicha tegishli topshiriqlar berildi.