Joriy yilning 5-dekabr kuni Toshkentda “O‘zbekiston agrar oziq-ovqat sektorida iqlim o‘zgarishi: tahdidlar va imkoniyatlar. Barqaror muhitni yaratish tadbirlari” mavzusida kengaytirilgan davra yig‘ilishi bo‘lib o‘tdi. Tadbir O‘zR Qishloq xo‘jaligi vazirligi tomonidan Yevropa Ittifoqining Qishloq xo‘jaligini qo‘llab-quvvatlash va soha bilimlarini oshirish (ASK) dasturi texnik ko‘magi bilan tashkil etildi.
Unda iqlim o‘zgarishi masalalari uchun mas’ul vazirlik va davlat idoralari, xalqaro tashkilotlar, dehqon, fermer va agrar tadbirkorlar, shuningdek, ommaviy axborot vositalari vakillari ishtirok etdi. Tadbir kun tartibidan davra suhbati, matbuot anjumani hamda texnik seminarlar o‘rin oldi.
O‘zR Qishloq xo‘jaligi vaziri Aziz Voitov yig‘ilishni ochib berar ekan, harorat va yog‘ingarchilikning o‘zgarishi, suv toshqinlari, qurg‘oqchilik va boshqa ekstremal ob-havo hodisalarining ko‘payishi O‘zbekistonning ko‘plab hududlarida allaqachon, ekinlar hosildorligi va chorvachilik mahsuldorligiga o‘z ta’sirini o‘tkazayotganini, bu esa, o‘z o‘rnida, aholining oziq-ovqat ta’minoti barqarorligiga xavf tug‘dirayotganini, ushbu tahdidlarga qarshi birgalikda harakat qilish zarurligini ta’kidladi.
“Qishloq xo‘jaligi vazirligi tomonidan Yevropa Ittifoqining ASK dasturi texnik ko‘magida global isishning O‘zbekistonning turli hududlariga ko‘rsatadigan ta’siri bo‘yicha tadqiqot ishlari amalga oshirildi. Ushbu tadqiqot orqali biz global isish oqibatida mamlakatimizda yuz beradigan ehtimoliy ssenariylar va ularning oqibatlari bilan tanishishimiz mumkin.
Biz birgalikda ishlab, xalqaro tan olingan amaliyotlarni mahalliy sharoitga moslashtirib, yangi integratsiyalashgan dastur va maqsadli harakatlar rejasini ishlab chiqishimiz juda muhim”, — deb ta’kidladi A.Voitov o‘z nutqida.
Shuningdek, yig‘ilishning ochilish marosimida nutq so‘zlagan Yevropa Ittifoqining O‘zbekistondagi elchisi Sharlotta Adrian xonim xalqaro texnik ko‘mak namunasi sifatida ASK dasturini keltirib o‘tdi. Bundan tashqari, davlat va xususiy sektorni “yashil iqtisodiyot”ni rivojlantirish yuzasidan hamkorlik qilishga chaqirib, tabiiy resurslardan oqilona foydalanish va maqbul qishloq xo‘jaligi amaliyotlarini qo‘llashni rag‘batlantirish, muqobil energiya manbalariga sarmoya kiritishni targ‘ib qilishga chorladi.
Tadbirning amaliy qismida YEI ASK dasturi rahbari Adrian Nil O‘zbekiston agrar sektoridagi iqlim tahdidlari va imkoniyatlarini “Muammolar va yechimlar daraxti” misolida aks ettirdi. Taqdimotga muvofiq, mamlakatda iqlim o‘zgarishi muammolari deb, ko‘riladigan issiqxona gazlarining ajralishi, chang shamollari, tuproq sho‘rlanishi aslida muammo emas, balki muammo yaratayotgan ta’sirlar bo‘lib, haqiqiy muammo agrar oziq-ovqat sektorida iqlim o‘zgarishiga qarshi integratsiyalashgan milliy kurash yo‘lga qo‘yilmaganidadir.
Adrian Nil taqdimotidan so‘ng davra muhokamasi hamda tadqiqot metodologiyasi bo‘yicha batafsil taqdimotlar bo‘lib o‘tdi.
Tadbir doirasida ishtirokchilar global isish natijasida, O‘zbekiston qishloq xo‘jaligi sektorida 2050-yilgacha sodir bo‘lishi kutilayotgan o‘zgarishlar prognozini taqdim etdi.
Tadbirning panel muhokamasi yakunida O‘zbekiston Qishloq xo‘jaligini rivojlantirish strategiyasini muvofiqlashtiruvchi Kengash huzurida “Qishloq xo‘jaligi va oziq-ovqat sektorida iqlim o‘zgarishiga moslashish va uning oqibatlarini yumshatish bo‘yicha Idoralararo ishchi guruh” faoliyati yo‘lga qo‘yilgani e’lon qilindi.
Bundan tashqari, suv resurslari, chorva mollari va dehqonchilik bo‘yicha sinov dasturlarini shakllantirish va moliyalashtirish masalalari muhokama qilindi. Texnik ishlanmalar Idoralararo texnik ishchi guruhiga “Iqlim o‘zgarishiga moslashish va uning oqibatlarini yumshatish bo‘yicha Milliy chora-tadbirlar dasturi”ni ishlab chiqish uchun topshiriladigan bo‘ldi.
Imlo xatolari haqida hisobot
Quyidagi matn tahririyatimizga yuboriladi: