KARTOSHKA YETISHTIRISH VA SERTIFIKATLASH BO‘YICHA TRENINGLAR O‘TKAZILMOQDA

2022-yilning 8-10-noyabr kunlari Toshkent shahrida urug‘lik kartoshkani yetishtirish va sertifikatlash bo‘yicha treninglar hamda seminarlar o‘tkazilmoqda. Tadbirlar O‘zbekiston Respublikasi Qishloqxo‘jaligi vazirligi hamda Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) qo‘shma loyihasi doirasida tashkil etilgan. Treninglar mavzusi “COVID-19ga javoban kartoshkachilik sektorini tiklash va rivojlantirish” bo‘lib, ularni FAOning kartoshka urug‘chiligi bo‘yicha xalqaro eksperti Mehmet Emin Chalishkan (Turkiya) olib bormoqda.

Treninglarda jami 30 ga yaqin mutaxassislar, jumladan, O‘zR Qishloq xo‘jaligi vazirligiva  tizim tashkilotlari xodimlari ishtirok etmoqda.

Mashg‘ulotlar davomida kartoshkani ko‘paytirish va sifatli urug‘lik kartoshka ekishning afzalliklari, urug‘lik kartoshka yetishtirishga qo‘yiladigan umumiy talablar va boshqa muhim jihatlar ko‘rib chiqilyapti. Mutaxassis ishtirokchilarga ekishuchun joy tanlash, almashlabekish, ekishni boshqa ekinlardan izolyatsiyalash, ekish zichligi kabi muhim jihatlarni hisobga olgan holda dalaga kartoshka urug‘ini ekishning o‘ziga xos xususiyatlarini tushuntirib beryapti. Treningda suv resurslari va o‘g‘itlardan foydalanish, begona o‘tlar, zararkunandalar va kasalliklarga qarshi kurashish usullarini o‘rganishga alohida e’tibor qaratilmoqda.

“Seminardan ko‘zlangan asosiy maqsad O‘zbekistonda kartoshka yetishtirish imkoniyatlari va xavf-xatarlarini umumlashtirib tahlil qilishdan iborat. Umid qilamizki, trening va seminardan so‘ng biz O‘zbekistonda kartoshka urug‘chiligini rivojlantirish dasturini yaratish uchun qimmatli ma’lumotlarni olamiz”, — dedi FAOning kartoshka urug‘chiligi bo‘yicha xalqaro eksperti Mehmet Emin Chalishkan.

Ma’lumot uchun

Koronavirus pandemiyasining kartoshka yetishtirishga va mamlakatning oziq-ovqat xavfsizligiga salbiy ta’siriga qarshi kurashish maqsadida O‘zbekistonda 2021-yildan buyon O‘zbekiston Respublikasi Qishloq xo‘jaligi vazirligi bilan hamkorlikda FAOning “COVID-19ga javoban kartoshkachilik sektorini tiklash va rivojlantirish” loyihasi amalga oshirilmoqda. Loyiha O‘zbekistonda yuqori, barqaror va sifatli hosil yetishtirish orqali kartoshka sohasining mahsuldorlik salohiyatini oshirishga qaratilgan. Kartoshka navlarini ro‘yxatga olish va urug‘lik sertifikati tizimini takomillashtirish, kartoshka yetishtirishni modernizatsiya qilish, kasallik va zararkunandalardan himoya qilish, mahsulotlarni saqlash sharoitlarini yaxshilash bo‘yicha ilmiy-tadqiqot ishlarini takomillashtirish, shuningdek, ushbu sohada faoliyat yurituvchi fermerlar, agronomlar hamda boshqa mutaxassislarni tayyorlash bo‘yicha ishlar olib borilmoqda.