YANGI FORMATDAGI “FOOD CITY” SAVDO MARKAZIDA ERTALABKI ULGURJI SAVDO YO‘LGA QO‘YILADI

2022-yil 23-sentyabrdan 24-sentyabrga o‘tar kechasi “FOOD CITY” ulgurji bozori ochilishining ikkinchi bosqichi bo‘lib o‘tadi. Majmua ertalab soat 03:00 dan boshlab ulgurji xaridorlarga xizmat ko‘rsatishni boshlaydi.

Eslatib o‘tamiz, ochilishning birinchi bosqichida chakana savdo yo‘lga qo‘yilgan edi. Ikkinchi bosqichda esa ulgurli savdo o‘z ishini boshlamoqda.

“FOOD CITY” majmuasida xabar qilinganidek, ulgurji sotuvchilar (yetkazib beruvchilar va xaridorlar) uchun quyidagi imkoniyatlar paydo bo‘ladi:

• Yangi va qayta ishlangan qishloq xo‘jaligi oziq-ovqat mahsulotlarini quruq, muzlatgichli yoki sovutkichli do‘konlarda xarid qilish/saqlash;
• “Cross-docking” xizmati – mahsulotlarni omborxonalardan foydalanmagan holda to‘g‘ridan-to‘g‘ri ishlab chiqaruvchilarning o‘zidan xarid qilish;
• 400 ta yuk va 3000 ta yengil avtomobilga mo‘ljallangan tunu kun  faoliyat  ko‘rsatuvchi katta avtoturargoh;
• Uzoq viloyatlardan kelgan haydovchi va savdogarlar uchun “FOOD CITY” majmuasida tunu kun faoliyat ko‘rsatadigan barcha qulayliklarga ega mehmonxona xizmati mavjud.

Boshqa imkoniyatlar va xizmatlar haqida (+998) 55–500–00–04 telefon raqami va t.me/foodcityuz telegram-kanali orqali bilib olishingiz mumkin.

Ta’kidlash kerakki, “FOOD CITY”ni barpo etish jarayoni 2018-yilda boshlangan edi. Hozirda Vazirlar Mahkamasining tegishli qarori asosida eski Qo‘yliq dehqon bozorini mana shu savdo maskaniga bosqichma-bosqich ko‘chirish jarayoni ketmoqda. Kelgusida ushbu majmuani yanada kengaytirish va uning bazasida mahsulotlarni qayta ishlash tizimini yo‘lga qo‘yish maqsad qilingan.