FARG‘ONA VA QASHQADARYO VILOYATLARIDA INNOVATSION GURUHLAR QISHLOQ XO‘JALIGIDA YANGI G‘OYALARNI SINOVDAN O‘TKAZADI

Yevropa Ittifoqi tomonidan moliyalashtirilayotgan, O‘zbekiston Respublikasi Qishloq xo‘jaligi vazirligi bilan hamkorlikdagi “Qishloq xo‘jaligi va oziq-ovqat sektorining “yashil iqtisodiyot”ga inklyuziv o‘tishini qo‘llab quvvatlash va iqlimga yo‘naltirilgan qishloq xo‘jaligi bilimlari va innovatsion tizimini rivojlantirish” (“EU-AGRIN”) loyihasi doirasida Farg‘ona hamda Qashqadaryo viloyatlarida Innovatsion guruhlar shakllantirildi.

Ushbu guruhlarning potensial ishtirokchilarini aniqlash maqsadida Qashqadaryo va Farg‘ona viloyatlarida bir qator tadbirlar tashkil etildi.

Xususan, Farg‘ona viloyatida Don va dukkakli ekinlar hamda Paxta seleksiyasi, urug‘chiligi va yetishtirish agrotexnologiyalari ilmiy-tadqiqot institutlarining Farg‘ona ilmiy-tajriba stansiyalari, Beshariq tuman kasb-hunar kolleji, Quva tumanidagi “Yetakchi bog‘bon” klasteri hamda Farg‘ona viloyati agroxizmatlar markazi vakillari bilan uchrashuvlar o‘tkazildi.

Qashqadaryo viloyatida esa Janubiy dehqonchilik ITI, Qashqadaryo viloyati hokimligi, Chorvachilik va parrandachilik ilmiy-tadqiqot institutining Qashqadaryo ilmiy-tajriba stansiyasi, Akademik Mahmud Mirzayev nomidagi bog‘dorchilik, uzumchilik va vinochilik ITI, Sabzavot, poliz ekinlari va kartoshkachilik ITI, O‘simliklar genetik resurslari ITI hamda Qashqadaryo viloyati agroxizmatlar markazi vakillari bilan “Innovatsion guruh”larni shakllantirish maqsadida muhokamalar bo‘lib o‘tdi.

Uchrashuvlar va mulohazalar natijasida Farg‘ona viloyatida “Iqlim o‘zgarishiga, turli kasallik va zararkunandalarga chidamli serhosil va ertapishar, paxta navlarini yaratish va yetishtirish”, “Mahalliy iqlimga moslashtirilgan turli baliq turlarini ko‘paytirishni rivojlantirish» va “Maxsus ishlangan organik o‘g‘itlardan foydalangan holda intensiv yetishtiriladigan don-dukkakli ekin navlarini joriy etish” bo‘yicha innovatsion guruhlar shakllantirildi.

Qashqadaryo viloyatida “Sifatli un mahsulotlari uchun bug‘doyning ertapishar va janubiy iqlimga moslashgan qattiq navlarini yetishtirish”, “Hisori qo‘ylar turini ko‘paytirish”, “Poliz ekinlarining iqlimga mos mahalliy navlarini yaratish” hamda “Murakkab meliorativ holat bo‘lgan hududlarda yangi intensiv bog‘larni barpo qilish”ga qaratilgan 4 ta innovatsion guruh faoliyati yo‘lga qo‘yiladi.

Har bir Innovatsion guruh ilmiy tadqiqot institutlari, o‘rta maxsus o‘quv yurtlari, fermer va dehqon xo‘jaliklari, tadbirkor va hududiy AKIS markazi vakillaridan iborat bo‘ladi. Ushbu guruh aʼzolari ilmiy tadqiqotlarni amalda sinovdan o‘tkazib, ijobiy natijalarni qolgan hududlarga tatbiq qilishga zamin yaratadilar.

Bundan tashqari, Toshkent, Farg‘ona va Qashqadaryo viloyatlarida shakllantirilayotgan 12 ta innovatsion guruhlar faoliyatini samarali yo‘lga qo‘yish, innovatsion g‘oyalarni loyihaga aylantirish va uni moliyalashtirish bo‘yicha seminar-trening o‘tkazilishi rejalashtirilgan. Ushbu treningda innovatsion guruh aʼzolari grant mablag‘lariga mo‘ljallangan loyiha takliflarini  yozish bo‘yicha bilim va ko‘nikmalarini oshirish imkoniga ega bo‘ladilar.

Loyiha doirasida innovatsion guruhlarni o‘z hududlardagi tuproq va o‘simliklar holatini tahlil qiluvchi, shuningdek, veterinariya va boshqa xizmatlarni ko‘rsatishga mo‘ljallangan va zamonaviy anjomlar bilan jihozlangan ko‘chma laboratoriyalar bilan taʼminlanishi ko‘zda tutilgan.