SMART CAMPUS: AGRAR SOHADA TA’LIM JARAYONIGA AXBOROT KO‘MAGI

Ta’lim jarayonidagi raqamlashtirish zamonaviy hayotning dolzarb mavzusidir. Bugun O‘zbekiston Respublikasi Qishloq xo‘jaligi vazirligi tomonidan amalga oshirilayotgan, 2022-o‘quv yilidan boshlab Toshkent davlat agrar universiteti bazasida ishlay boshlaydigan “Smart Campus” loyihasi haqida so‘z yuritamiz.

 Hozirda O‘zbekistonda universitetlar faoliyatining to‘liq jarayonini axborotlashtirish tizimi mavjud emas. Ta’lim jarayonlarining o‘ziga xosligi va katta hajmdagi ma’lumotlardan kelib chiqqan holda, professor-o‘qituvchilar, ma’muriyat va talabalar ma’lumotlarni saqlash va almashishda qiyinchiliklarga duch kelishadi, shuningdek, talabalarning yutuqlari va davomatini nazorat qilishda texnik qiyinchiliklar mavjud. Ushbu va boshqa muammolarni hal qilish uchun “Smart Campus” platformasi ishlab chiqildi.

Loyiha haqida

O‘zbekiston Respublikasi Prezidentining “Agrar ta’lim tizimini yanada takomillashtirish chora-tadbirlari to‘g‘risida”gi qaroriga muvofiq “Agrosanoatni raqamlashtirish markazi” davlat boshqarmasi tomonidan “Smart Campus” platformasi konsepsiyasi ishlab chiqilgan. 2020-yil 30-iyuldagi PQ-4795-son va O‘zbekiston Respublikasi Vazirlar Mahkamasining 2030-yilgacha qishloq xo‘jaligi ta’lim tizimini innovasion rivojlantirish strategiyasini tasdiqlash to‘g‘risida 2020-yil 15-dekabrdagi 788-son qarori va Qishloq xo‘jaligi vazirligining 2021-yil 20-dekabrdagi “Toshkent agrar universitetida “Smart Campus” loyihasini amalga oshirish to‘g‘risida”gi 283-son buyrug‘ini bajarish maqsadida ushbu tizim ishlab chiqilgan.

“Smart Campus” platformasi nima uchun kerak?

“Smart Campus” platformasidan ko‘zlangan maqsad abituriyentning o‘qishga qabul qilinishidan tortib to universitetni tamomlashigacha bo‘lgan barcha bosqichlarda ta’lim jarayonining samarali axborot ta’minoti va shaffofligini ta’minlashdan iborat. Tizim ta’lim sohasidagi asosiy biznes jarayonlarni boshqarish samaradorligini oshirish uchun barcha zarur shart-sharoitlarni yaratib beradi.

“Smart Campus” universitetning butun boshli o‘quv jarayonini jamlash va saqlash, tahlil hamda monitoring qilish imkonini beradi, o‘quv jarayonining ishlashi uchun ko‘p komponentli axborot-ma’lumot bazasini yaratadi. Tizimda saqlanadigan hujjatlar, o‘quv materiallari va ma’lumotlar kechayu kunduz axborotni qidirish, saqlash, foydalanish va tarqatish imkoniyatini beradi. Platforma talabalarning davomati, topshiriqlarning bajarilishini boshqarish va nazorat qilish jarayonlarini avtomatlashtiradi, shuningdek, talabalar yutuqlarini doimiy ravishda kuzatib boradi.

Platformada, shuningdek, elektron hujjatlarning uzatilishi va saqlanishini himoya qiluvchi hamda texnik va dasturiy ta’minot, shuningdek, elektron hujjatlar va axborot resurslariga ruxsatsiz kirishdan zarur xavfsizlik darajasini ta’minlaydigan hamda, albatta, ma’lumotlarning maxfiyligini ta’minlaydigan axborot xavfsizligi tizimi mavjud.

Yangi platforma qayerda qo‘llaniladi?

“Smart Campus” platformasi Toshkent davlat agrar universiteti bazasida ish boshlaydi. Bu O‘rta Osiyodagi eng yirik qishloq xo‘jaligi oliy o‘quv yurtlaridan biri bo‘lib, 1930-yilda tashkil etilgan. Universitetda qishloq xo‘jaligi sohasi mutaxassislari, ilmiy-pedagogik kadrlar tayyorlanadi, bu yerda ilmiy-tadqiqot ishlari ham olib boriladi.

Qamrov bo‘yicha rejalar

2022-yilning sentyabr oyida platformadan foydalanishga o‘rgatish bo‘yicha barcha zarur jarayonlar tamomlangach, amaliyotda tizimning sinov bosqichi o‘tkazildi. Ijobiy natijalarga erishilgan taqdirda O‘zbekiston Respublikasi bo‘ylab qishloq xo‘jaligi sohasidagi 11 ta texnikum va 5 ta oliy o‘quv yurti “Smart Campus” platformasiga o‘tkaziladi, ya’ni tizim har yili 25 000 talabani qamrab oladi.

Platforma haqidagi qiziqarli faktlar

Platforma tili: o‘zbek, rus, ingliz.

To‘lov: platforma bepul ishlaydi.

Ishlab chiqish muddatlari: platformani ishlab chiqish va mazmunini boyitish ustidagi ishlar 8 oydan beri davom etmoqda, u 2022-yil sentyabr oyidan ishlay boshlaydi.