INTERNSHIP.AGRO.UZ - TALABALAR VA ISH BERUVCHILARNI BOG‘LOVCHI QULAY PLATFORMA

INTERNSHIP.AGRO.UZ – TALABALAR VA ISH BERUVCHILARNI BOG‘LOVCHI QULAY PLATFORMA

Toshkent davlat agrar universitetida O‘zbekiston Respublikasi Qishloq xo‘jaligi vazirligi huzuridagi Agrosanoatni raqamlashtirish markazi tomonidan yaratilgan internship.agro.uz platformasidan foydalanish bo‘yicha trening tashkil etildi. Onlayn va oflayn shaklda o‘tkazilgan ushbu uchrashuvda vazirlik tizimidagi ilmiy-tadqiqot institutlari, AKIS agroxizmatlar markazlari, qishloq xo‘jaligi boshqarmalari xodimlari, TDAU o‘qituvchilari va boshqa tegishli tashkilot xodimlari ishtirok etishdi.

Trening davomida Agrosanoatni raqamlashtirish markazi dasturchilari 100 nafarga yaqin ishtirokchilar uchun internship.agro.uz platformasini ishlatish, uning afzalliklari va imkoniyatlari haqida batafsil tushuntirib berishdi. Tadbirda taʼkidlanganidek, mazkur platformadan foydalanish kelgusida tashkilotlar bilan TDAU o‘rtasidagi hamkorlikni yanada rivojlantirish uchun xizmat qiladi.

Uchrashuv ishtirokchilari, shuningdek, o‘zlarini qiziqtirgan savollariga javob oldilar. Qolaversa, ayni vaqtda pilot loyiha sifatida ishga tushirilayotgan platforma ishini yanada yaxshilash borasida takliflar bildirildi. Taʼkidlash joiz, internship.agro.uz platformasiga bugungi kunda boshqa OTMlar ham qiziqish bildirmoqda.

Bugungi trening O‘zbekiston Respublikasi Prezidenti Shakat Mirziyoyevning 2022-yil 4-mart kuni oliy o‘quv yurtlari talabalari bandligini taʼminlash bo‘yicha ustuvor vazifalarga bag‘ishlab o‘tkazilgan videoselektor yig‘ilishida belgilangan vazifalar ijrosi yuzasidan Toshkent davlat agrar universiteti talabalarining malakaviy amaliyotlarini samarali olib borish maqsadida tashkil etildi.