Fermerlar uchun xalqaro mutaxassislardan mosh yetishtirish bo‘yicha tavsiyalar

Nukus shahrida Qoraqalpog‘iston Respublikasi Qishloq xo‘jaligi vazirligi ishtirokida Qurg‘oqchil mintaqalarda qishloq xo‘jaligi tadqiqotlari xalqaro markazi (IKARDA) hamda Xorazm agromaslahat markazi (KRASS) tomonidan “Mosh yetishtirishning yaxshilangan texnologiyalari” mavzusida seminar-trening bo‘lib o‘tdi. Unda mutaxassislar bilan bir qatorda “g‘o‘za – bug‘doy” almashlab ekish jarayonida mosh yetishtirishga qiziqish bildirgan fermer xo‘jaliklari rahbarlari ishtirok etishdi.

O‘quv treningi davomida Germaniya xalqaro hamkorlik jamiyati ekspertlari ham o‘z tajribasi bilan o‘rtoqlashishdi. Uchrashuvda fermerlarga mosh yetishtirish, hosil yig‘ilgandan keyin unga ishlov berish, ushbu o‘simlikni himoya qilish choralari hamda urug‘larni to‘g‘ri tanlash masalalari bo‘yicha tegishli tavsiyalar berildi. Treningdan asosiy maqsad moshning yuqori hosildor navlarini ekadigan fermerlarning salohiyatini oshirishdan iborat bo‘ldi.

Tadbirda taʼkidlanganidek, mosh O‘zbekistonda azaldan unchalik katta hajmda yetishtirib kelinmagan. Shu sababli fermerlar uchun yaxshilangan texnologiyalardan foydalangan holda ushbu ekinni yetishtirishga doir bilimlar zarur. Ular dukkakli don ekinlari bo‘yicha yetakchi hisoblangan Hindiston, AQSH, Xitoy, Tayland, Misr va Avstraliya kabi davlatlar tajribasini o‘rganishlari kerak. Qolaversa, mosh hosilini zamonaviy kombaynlar va kichik texnika vositalari orqali terib olishga alohida ahamiyat qaratish foydadan holi bo‘lmaydi.

Mosh – dukkakli oziq-ovqat ekini bo‘lib, vegetatsiya davri qisqa va g‘o‘za-bug‘doy almashlab ekish jarayonida qo‘shimcha ekin sifatida yaxshi mos keladi. Issiqlik va qurg‘oqchilikka chidamli bo‘lgan mosh yozning yuqori haroratiga bardosh bera oladi va ko‘p suv talab qilmaydi. U ozuqa moddalariga talabchan ikki ekin – bug‘doy va paxta o‘rtasida tuproqqa ozuqa moddalarini qo‘shadi. Bu esa mazkur almashlab ekish jarayonida qo‘shimcha daromad keltiradi. Mosh ozuqa ekini va qimmat turadigan hayvon oqsili o‘rnini qisman bosa oladi.

O‘quv treningi doirasida Qoraqalpog‘iston Respublikasi sharoitida bahorgi va kuzgi bug‘doy yetishtirishga bag‘ishlangan dala kuni bo‘lib o‘tdi.