Andijon qishloq xo‘jaligi va agrotexnologiyalar instituti

O‘zR Qishloq xo‘jaligi vazirligi huzuridagi Andijon qishloq xo‘jaligi va agrotexnologiyalar instituti Prezidentning 2020-yil 30-iyuldagi PQ-4795-son “Agrar taʼlim tizimini yana-da takomillashtirish chora-tadbirlari to‘g‘risida”gi qaroriga asosan Toshkent davlat agrar universitetining Andijon filiali negizida tashkil etilgan.

Bugungi kunda institutda 4 450 o‘ringa mo‘ljallangan, taʼlimning texnik vositalari bilan jihozlangan 4 ta zamonaviy o‘quv binosi, yangi uskunalar bilan taʼminlangan 9 ta laboratoriya xonasi, 46 gektar maydondagi axborot-maslahat markazi, 700 o‘rinli 2 ta talabalar turar joyi, sport zali va maydoncha, axborot-resurs markazi joylashgan. Universitet hududi to‘liq Wi-Fi zonasi bilan qoplangan.

Talabalarning bo‘sh vaqtida bandligi uchun 7 gektar maydonga ega 2 ta issiqxona, intensiv bog‘ yaratilgan. Shuningdek, institut hududida o‘quv-tajriba xo‘jaligi tashkil etilgan bo‘lib, u yerda o‘qituvchi va talabalar ilmiy tadqiqotlar o‘tkazishi, tajribalarini olib borishi mumkin.

Institut tuzilmasida quyidagi yo‘nalishlar bo‘yicha fakultetlar faoliyat yuritadi:

1. Agrobiznes va raqamli iqtisodiyot
2. Agrotexnologiya
3. Agromuhandislik va gidromelioratsiya
4. O‘simliklarni himoya qilish, agrokimyo va tuproqshunoslik
5. Qishloq xo‘jaligi mahsulotlarini saqlash va qayta ishlash

2021–2022-o‘quv yilidan boshlab bakalavriatning quyidagi yo‘nalishlari bo‘yicha kadrlar tayyorlash yo‘lga qo‘yilgan:

1. Organik qishloq xo‘jaligi mahsulotlarini yetishtirish, saqlash va qayta ishlash
2. Qishloq xo‘jaligi huquqi
3. Uzumchilik va vinochilik

2021–2022-o‘quv yilidan boshlab magistraturaning quyidagi yo‘nalishlari bo‘yicha taʼlim yo‘lga qo‘yilgan:

1. Agrotuproqshunoslik va agrofizika (tarmoqlar bo‘yicha)
2. Agrokimyo, agronomiya, seleksiya va urug‘chilik (ekin turlari bo‘yicha)
3. Qishloq xo‘jaligi mahsulotlarini saqlash va birlamchi qayta ishlash texnologiyasi (mahsulot turlari bo‘yicha)
4. Sabzavotchilik va polizchilik
5. Mevachilik
6. Himoyalangan yerlarda meva-sabzavotchilik
7. Qishloq xo‘jaligini mexanizatsiyalash (tarmoqlar bo‘yicha)
8. Qishloq xo‘jaligi biotexnologiyasi
9. Dorivor o‘simliklarni yetishtirish texnologiyasi