YOSH OLIMLAR VA TALABALARNING TAJRIBA ALMASHINUVI YO‘LGA QO‘YILADI

O‘zbekiston Respublikasi Qishloq xo‘jaligi vaziri Aziz Voitov Vengriyaning “MATЕ” – qishloq xo‘jaligi va tabiiy fanlar universiteti rektori Chaba Dyuricha boshchiligidagi delegatsiya bilan uchrashdi.

Uchrashuvda ikki davlat o‘rtasida agrar sohadagi hamkorlik tobora mustahkamlanib borayotgani, xususan, 2021-yilning mart oyida mamlakatlarimiz rahbarlari boshchiligida faoliyatini boshlagan O‘zbek-Vengriya kartoshkachilik markazi hamkorlikdagi amaliy qadamlardan biri bo‘lgani, ayni damda esa Vengriyaning 5 turdagi kartoshka urug‘i navlari yurtimizda yetishtirilayotgani ta’kidlandi.

Tadbirda Vengriyaning Niredxaza universiteti bilan har yili O‘zbekiston qishloq xo‘jaligi oliygohlarida tahsil olayotgan  talabalar orasidan tanlov asosida saralab olingan 10 nafar yoshlarning mazkur universitetda grant asosida ta’lim olishi bo‘yicha kelishuvga erishilgani, bunda “Master Gud” kompaniyasining alohida tutgan o‘rni  haqida ham  aytib o‘tildi.

Shuningdek uchrashuvda 2023-2024-o‘quv yilida Toshkent davlat agrar universiteti hamda Vengriyaning MATE – universiteti hamkorligida Oziq-ovqat xavfsizligi mutaxassisligi bo‘yicha magistratura bosqichini yo‘lga qo‘yish, mazkur nufuzli universitetda TDAU yosh olimlarining stajirovka o‘tashlarini amalga oshirish, vengriyalik professor-o‘qituvchilarni mutaxassisligi bo‘yicha TDAUda dars berish uchun taklif qilish, professor o‘qituvchilar va talabalar tajriba almashinuvini yo‘lga qo‘yish imkoniyatlari muhokama qilindi.

Ma’lumot uchun: Vengriyaning “MATE” – qishloq xo‘jaligi va tabiiy fanlar universiteti 2000-yilda ikkita ixtisoslashgan universitet negizida tashkil etilgan bo‘lib, Yevropadagi eng yirik qishloq xo‘jaligi universiteti hisoblanadi. Uning Budapesht, Gyongyos, Kaposvar va Kesteli shaharlarida o‘z filiallari va 11ta tadqiqot institutlari mavjud. Hozirgi kunda  ushbu universitetda 16 ming nafardan ziyod talabalar tahsil olmoqda.